Беларуслик мутахассис Александр Евгеньевич Сотников "Миллий банклараро процессинг маркази" АЖ (HUMO тўлов тизими) бошқаруви раиси этиб тайинланди. Тегишли ўзгариш HUMO тўлов тизими расмий веб-сайти (русча версиясида) қайд этилган (cайтнинг ўзбекча ва инглизча вариантларида бошқарув раиси сифатида Улуғбек Бахадиров кўрсатилган).

^{Фотскрин: humocard.uz}

Александр Сотников ушбу лавозимда ўтган йилнинг сентябрь ойидан буён ишлаб келган Улуғбек Баҳодиров ўрнини эгаллайди.

Жорий йилнинг май ойи ўрталарида Беларусь Банк процессинг марказининг (БПЦ — «Белкарт» миллий тўлов тизими оператори) собиқ бош директори Александр Сотников Ўзбекистондаги HUMO тўлов тизими бошқаруви раиси ўринбосари лавозимига тайинланган эди.

Александр Сотников беларуслик банк тизими топ-менежери. 1991—1996 йилларда Беларусь давлат университетини география, 1999—2002 йилларда Беларусь давлат иқтисодиёт университетини банк иши мутахассислиги бўйича тамомлаган.

2009—2026 йилларда Беларуснинг турли банк ва молия компаниялари ўрта ва топ менежментида ишлаган. Белинвестбанк, Беларусь Миллий банки, Белгазпромбанкларда фаолият олиб борган. 2021 йил май ойидан 2026 йил май ойигача Беларусь Банк процессинг марказига раҳбарлик қилган.

Александр Сотников 2026 йилнинг май ойида Тошкентга кўчиб ўтиб, Миллий банклараро процессинг маркази бошқарув раиси биринчи ўринбосари этиб тайинланган. Бироқ А.Сотников тайинлови ҳақида HUMO расмий сайтида ҳеч қандай маълумот берилмаган эди. Миллий банклараро процессинг маркази Кузатув кенгашининг 1 июлда қабул қилган қарорида Александр Сотниковнинг бошқарув раиси биринчи ўринбосари лавозимидан озод этилгани, ўрнига Рустам Каримов тайинлангани кўрсатилган.

Эслатиб ўтамиз, 2025 йилнинг январида Миллий банклараро процессинг маркази капиталидаги 100 фоиз давлат улуши “Paynet” компаниясига 65 млн доллар эвазига сотилганди. Шундан сўнг, компания ташкил топгандан (2019 йил) буён унга раҳбарлик қилиб келган Шуҳратбек Курбанов лавозимини тарк этган эди. Ш.Курбановдан сўнг компанияга дастлаб Алексей Максимов (3 ой) раҳбарлик қилди. Кейинчалик А.Максимов лавозимидан кетгач, унинг вазифалари вақтинча Мақсад Мухитдиновга юклатилди. 2025 йил сентябрь ойида эса, жамият раиси этиб Улуғбек Баҳодиров тайинланган эди.