“Миллий банклараро процессинг маркази” АЖ (HUMO тўлов тизими) капиталидаги 100 фоиз давлат улушини хусусийлаштириш бўйича келишувга эришилди. Бу ҳақда Давлат активларини бошқариш агентлиги хабар берди.

Аввалроқ, HUMO тўлов тизимини хусусийлаштириш бўйича консультант - Deloitte томонидан келиб тушган барча аризалар аввал маълум қилинган мезонлар асосида ўрганиб чиқилгани ва талабларга мувофиқ келадиган 6 нафар талабгор хусусийлаштириш жараёнининг навбатдаги босқичига ўтказилгани айтилганди.

Давактивнинг маълум қилишича, талабгорларга "Deloitte" томонидан тайёрланган молиявий, солиқ, ҳуқуқий ва экологик фаолияти бўйича комплекс таҳлилий ҳисоботлар (due diligence) билан танишиш, шунингдек, жамият бошқарув органи билан учрашиш имкони берилган.

HUMO тўлов тизимини сотиб олиш бўйича учта иштирокчидан "Мажбурий таклифлар" (ВО) келиб тушган ва 65 миллион АҚШ доллари миқдорида энг юқори харид баҳосини таклиф қилган “Paynet” акциядорлик жамияти ким ошди савдосининг ғолиби деб топилган.

Харидорнинг мазкур таклифи Маслаҳатчи ҳисоблаган индикатив нархлар интервали чегарасида жойлашган ва "KPMG" халқаро мустақил нархловчи томонидан нарх қўйилган баҳодан юқори ҳисобланади.

Харидор Жамиятга тегишли бўлган «HUMO» тўлов тизимининг барқарор ва узлуксиз ишлашини таъминлашга қаратилган қўшимча тадбирларни амалга ошириш бўйича мажбуриятларни, шунингдек, тизим фойдаланувчиларининг махфий (шахсий ва банк) маълумотларини ҳимоя қилишни зиммасига олган.

Эслатиб ўтамиз, Миллий банклараро процессинг маркази (HUMO тўлов тизими)нинг тўлиқ хусусийлаштирилиши ҳақида Президентнинг 2024 йил 19 апрелдаги "Иқтисодиётда давлат иштирокини қисқартиришнинг қўшимча чора-тадбирлари тўғрисида"ги қарорида маълум қилинганди.

Маълумот учун: "Paynet" АЖ – Ўзбекистон молиявий технологиялар (финтех) соҳасида 18 йилдан буён фаолият юритаётган энг йирик тўлов операторларидан бири ҳисобланади. Тизим 1500 тадан ортиқ товар ва хизматлар етказиб берувчилар учун тўлов имкониятини таъминлаб, ундан фойдаланувчиларнинг йиллик сони 20 миллиондан зиёдни ташкил қилади.