Ўзбекистоннинг йирик тўлов тизимларидан бири Paynet ўз фаолият доирасини кенгайтириб, банк секторига кириб боришни мақсад қилган. Бу ҳақда компания бошқарув раисининг биринчи ўринбосари Музаффар Камилов Кирилл Альтманнинг Alter Ego лойиҳасига берган интервьюсида маълум қилди.

Суҳбат давомида компаниянинг стратегик ривожланиш йўналишлари, хусусан, тўлов ташкилотидан тўлақонли молиявий институтни шакллантириш жараёнлари муҳокама қилинган.

Музаффар Камиловнинг таъкидлашича, бугунги кунда фақат тўлов тизими сифатида ривожланиш қийин.Шу мақсадда компаниянинг стратегиясида "банк сотиб олиш" режаси ҳам бор.

"Агар тўлов ташкилотининг ривожланиш йўлини қарайдиган бўлсангиз, 2 та вариант бор: ёки телеком билан бирлашасиз, ёки банк томон юрасиз. Телеком бу Африка, Осиё[га хос], банк эса Европа ва бошқалар. Уларнинг ўртасидаги гибрид вариант ҳам бор".

Музаффар Камиловнинг сўзларига кўра, банклар хизмат кўрсата олмайдиган "unbanked" ҳамда "underbanked" сегментларига хизмат кўрсатиш учун финтех эгалик қиладиган банк керак. Банклар мослашувчан бўлмагани туфайли, бу сегментларга [хизматларни] етказиб бера олмайди. Финтех эса исталган сегментга кира олади. Қамров бўйича ҳам, технология бўйича ҳам, маҳсулот бўйича ҳам, дея таъкидлаган Камилов.

Унинг айтишича, ҳозирча "банк секторига кириш" бўйича тегишли таклифлар раҳбариятга киритилган ва тегишли қарор қабул қилиниши кутилмоқда.

Маълумот учун: "Unbanked" - бизнес ва аҳолининг банкларда умуман ҳисоб рақами бўлмаган қисми. "Underbanked" - банк хизматлари етарли бўлмаган ёки ихтиёрий равишда банк хизматларидан фойдаланмайдиган мижозлар. Уларда банк ҳисобрақами номиналда мавжуд бўлса-да, улар банк хизматларидан пулни нақдлаштириш ва қолган операцияларни нақд транзакциялар орқали амалга ошириш жараёнидагина фойданалади.

Музаффар Камилов интервью давомида Халқ банки билан узоқ йиллик "ҳамкорлик" алоқалари мавжуд эканлигига ҳам тўхталиб ўтган.

Paynet компанияси ҳақида: 

"Paynet" тўлов тизимига 2005 йилда финтех-тадбиркор Ботир Арифжанов ва унинг шериклари томонидан асос солинган. Кейинчалик, бренд эгаси ҳисобланган “UZPAYNET” МЧЖ давлат тасарруфига ўтказилган, 2014 йилдан эса компания Халқ банки муассислигида фаолият юрита бошлаганди.

Кейинроқ эса "UZPAYNET" МЧЖ Давлат активларини бошқариш агентлигига ўтказилганди ва 2022 йилнинг май ойида компания хусусийлаштирилиши маълум қилинган эди. Орадан қарийб икки йил ўтиб, 2024 йил бошида жамиятнинг 100 фоизлик давлат улуши "Nеw Industrial Technologies" МЧЖга сотилгани маълум бўлганди.

Ўтган йилнинг январь ойида Paynet "Миллий банклараро процессинг маркази" акциядорлик жамияти (HUMO тўлов тизими)даги 100 фоизлик давлат улушини 65 млн АҚШ доллари эвазига сотиб олди. 

Эслатиб ўтамиз, “Paynet” АЖ 2025 йилнинг тўққиз ойи давомида 330,5 млрд сўм (тахминан 27,4 млн доллар) соф фойда олди ва компания соф фойдаси 2024 йилнинг мос даврига нисбатан 59 фоизга ўсди.