"Ягона умумреспублика процессинг маркази" АЖ (UZCARD) 2025 йилнинг биринчи ярим йиллиги бўйича молиявий ҳисоботини эълон қилди.

2025 йил январь-июнь ойлари якунига кўра компаниянинг соф фойдаси 621,6 млрд сўмни ташкил этди. Бу кўрсаткич ўтган йилнинг шу даврига нисбатан 214,7 млрд сўмга ёки 52,7 фоизга юқоридир (2024 йил мос давридаги соф фойда — 406,9 млрд сўм).

Ҳисобот даврида UZCARD даромади 68,7 фоизга ўсиб, 953,3 млрд сўмга етди. Операцион фойда эса 59,7 фоизга кўпайиб, 636,4 млрд сўмни ташкил қилди.

Компания акционерлари учун юқори даромадли дивиденд сиёсатида давом этди: яқинда эълон қилинган яна бир ҳисоботда жамият акциядорларига 300 млрд сўм дивиденд тўлаганини кўриш мумкин. Бу бир акция учун 6 000,14 сўм, яъни номинал қийматдан олти баравар кўп деганини билдиради.

UZCARD’нинг тақсимланмаган фойдаси 730,5 млрд сўмга етди (ўтган йил мос даврига нисбатан 2,8 баробарга ўсиш), активлари эса 57,9 фоизга кўпайиб, қарийб 1 трлн (997,3 млрд) сўмга етди.

Эслатиб ўтамиз, 2022 йил октябрида "Ягона умумреспублика процессинг маркази" АЖнинг 75% улуши 210,1 млрд сўмга сотилган, компания умумий қиймати 280 млрд сўм деб баҳоланганди.

Gazeta.uz нашри "орадан икки йил ўтиб, компаниянинг молиявий натижалардан унинг реал қиймати ўша пайтда анча паст баҳолангани маълум бўлаётгани"га эътибор қаратди.

Хусусан, 2023 йил якунига кўра Uzcard’нинг соф фойдаси 51,6 млн долларга тенг бўлган. Биргина ўша йилнинг тўққиз ойидаёқ фойда 660,4 млрд сўм (тахминан $51 млн)га етган — бу эса сотув баҳосидан анча юқори эканлигини англатар эди. Жамиятнинг 2024 йилдаги соф фойдаси 955 млрд сўмни ташкил қилган.

Эслатиб ўтамиз, яқинда яна бир тўлов тизими — HUMO ҳам ярим йиллик ҳисоботини эълон қилган, унга кўра компания соф фойдаси 124,3 млрд сўм бўлгани маълум қилинганди (ўтган йил мос даврига нисбатан 73% кўп).