Қозоғистоннинг йирик молия корпорациялари — Kaspi.kz ҳамда Freedom Holding Corp. маҳаллий банкларни сотиб олиш орқали Туркия банк бозорига кирмоқда.

Freedom Bank A.Ş.

Freedom Holding Corp. маҳаллий Turkish Bank A.Ş. нинг 99,32% акцияларини харид қилиш учун $33,4 млн тўлаган. Бу ҳақда компаниянинг Остона халқаро биржаси сайтида жойлаштирилган молиявий ҳисоботида айтилган.

Холдингнинг Туркиядаги шўба корхонаси Freedom Finansal Hizmetler A.Ş. Turkish Bank A.Ş. акциядорлаи билан битимни 31 июль куни ёпган ва банкни Freedom Bank A.Ş. деб қайта номланган. Freedom Finansal Hizmetler A.Ş. 1 июль куни маҳаллий банк ва монополияга қарши курашиш регуляторларидан тегишли рухсатнома олган.

Freedom Holding Turkish Bank акцияларини Özyol Holding A.Ş. ва Кувайт миллий банкидан сотиб олган.

Қайд этилишича, Freedom Holding Corp бошқа юрисдикцияларда ҳам банк фаолиятини амалга ошириш имкониятларини кўриб чиқмоқда.

Компания Туркиядаги банк атрофида молиявий ва кундалик хизматлар экотизимини ривожлантиришни, шунингдек, асосий капитал ва технологик ривожланишга инвестиция киритишни режалатираётганини маълум қилган.

Freedom Holding Туркия бозорида 2025 йилдан бери Freedom Investment Securities A.Ş. брокерлик компанияси орқали фаолият юритиб келаётган эди.

Hepsi Bank

Kaspi.kz финтех-гуруҳи Туркиянинг Rabobank A.Ş. ни сотиб олиш битимини 1 ой олдин якунлади ва банкни Hepsi Bank деб қайта номлашга қарор қилди. Бу ҳақда компаниянинг 2026 йил I ярим йиллигига бағишланган молиявий ҳисоботида қайд этилган.

Kaspi.kz, банк платформасидан фойдаланган ҳолда, Hepsiburada маркетплейси фойдаланувчилари учун пилот харид қилиш кредити хизматини ишга туширди ва 2027 йилда мамлакатда финтех маҳсулотларини кенг кўламда ишлаб чиқишни бошлашни режалаштирмоқда.

Kaspi.kz 2025 йил март ойида Голландиянинг Rabobank гуруҳининг Туркиядаги шўъба корхонасини сотиб олганини эълон қилган эди. Битим Туркия банк регуляторлиги ва назорати агентлиги (BDDK) томонидан тасдиқланиши сабабли бир неча бор кечиктирилди. Компания регуляторнинг розилигини 2026 йил 24 июнда олди ва битим 15 июльда якунланганини эълон қилди.

Битим қиймати ошкор қилинмади. Kaspi.kz илгари сотиб олиш компания учун аҳамиятли эмаслигини таъкидлаган эди. Ҳаммуассис ва бош директор Михаил Ломтадзе банкни сотиб олгандан сўнг, компания Туркияда электрон тижорат ва финтехни ривожлантиришга тахминан 300 миллион доллар сармоя киритишни режалаштираётганини айтди.

Kaspi.kz томонидан 2025 йилда назорат пакети тахминан 1,13 миллиард долларга сотиб олинган Hepsiburada маркетплейсидан кейин Rabobank A.Ş. Kaspi.kz'нинг Туркиядаги иккинчи активига айланди.

2026 йил 1 июль ҳолатига кўра, Kaspi.kzнинг энг йирик акциядорлари Директорлар кенгаши раиси Вячеслав Ким (19,1%), ҳаммуассис ва бош директор Михаил Ломтадзе (21,95%) ва Baring Funds инвестиция фонди (18,1%) ҳисобланади.

Kaspi.kzнинг йилнинг биринчи ярмидаги даромади 23 фоизга ўсиб, 2,2 триллион тенгега етди. Бироқ, соф фойда ўтган йилга нисбатан 510,8 миллиард тенге бўлиб, ўзгаришсиз қолди. Туркияга инвестициялар ва Қозоғистондаги юқори молиялаштириш харажатлари натижага таъсир кўрсатди.

Ўтган йили Қозиғистоннинг энг йирик банки Halyk Bank Click акцияларининг 49 фоизини 176,4 млн долларга сотиб олиши, Click эса ўз навбатида Halyk Bank'нинг Ўзбекистондаги шўъба банки — Tenge Bank акцияларининг 49 фоизини 60,76 млн долларга сотиб олиши бўйича келишув имзоланган эди. Сентябрь ойида Halyk Bank мазкур битим учун Қозоғистон регуляторидан розилик олган. Бироқ, Ўзбекистон регуляторлари рухсати олинмагач, келишув якунланмади.

Аввалроқ Озарбайжон халқаро банки (ABB) 100 миллион доллардан зиёд сармоя эвазига "Давр-банк" ХАТБнинг 51 фоизлик назорат пакетини сотиб олиш битимини якунлаётганини хабар қилган эдик.