Kaspi.kz компаниясининг инвесторлар учун мўлжалланган расмий платформасида (ir.kaspi.kz) эълон қилинган хабарга кўра, Хитойнинг Tencent корпорацияси, Kaspi.kz ҳаммуассиси ва бош директори Михаил Ломтадзе, топ-менежмент жамоасининг асосий аъзолари ҳамда АҚШнинг бир қатор институционал инвесторлари Kaspi.kz'нинг 6 миллион дона Америка депозитар акцияларини (ADS) сотиб олиш жараёнини якунлади.

Акциялар шу пайтгача компаниянинг асосий эгаларидан бири бўлиб келган "Baring Fintech Venture Funds" жамғармасидан сотиб олинган. Халқаро молиявий нашрларнинг ҳисоб-китобларига кўра, сотиб олинган 6 миллион дона ADS компаниянинг тахминан 3,2 фоизлик улушини ташкил этади ва битимнинг умумий қиймати 518 миллион АҚШ долларига баҳоланмоқда. Ушбу йирик савдода Morgan Stanley инвестиция банки молиявий маслаҳатчи сифатида иштирок этган.

Янги узоқ муддатли акциядорлар қаторидан, шунингдек, глобал миқёсдаги "Spice Expeditions" финтех-инвестиция фирмаси, Вашингтон (Washington University) ва Висконсин (University of Wisconsin Foundation) университетларининг эндаумент-фондлари ҳам жой олди.

"Tencent суперилова (super app) бизнес-моделининг кашшофи ҳисобланади. Биз унинг кенг кўламли инновацияларни қатъий ижро интизоми билан уйғунлаштира олиш қобилиятини азалдан қадрлаймиз. Tencent'ни энг йирик акциядорларимиздан бири сифатида кўришдан мамнунмиз. Менинг шахсий инвестициям, шунингдек, топ-менежментимиз асосий аъзоларининг сармоялари эса Kaspi.kz'нинг бизнес-моделига, узоқ муддатли стратегиясига ва келажакдаги ўсиш имкониятларига бўлган қатъий ишончимизни акс эттиради", — дея таъкидлади Михаил Ломтадзе.

Маълумот ўрнида, 1998 йилда Шэньчжэн шаҳрида асос солинган Tencent корпорацияси дунёга машҳур WeChat мессенжери, онлайн ўйинлар ва рақамли молиявий хизматлар экотизимининг эгаси ҳисобланади. Корпорация бутун дунё бўйлаб интернет компанияларига фаол сармоя киритиб келади. Бу уларнинг Қозоғистон бозорига киритган илк йирик инвестицияси ҳисобланади.

Ломтадзенинг сўзларига кўра, стратегик ва институционал капиталнинг бундай уйғунлашуви Kaspi.kz учун жуда муҳим даврда — Қозоғистон бозоридаги етакчиликни мустаҳкамлаш ва Туркия бозорига кенгайиш босқичида юз бермоқда. Хабарлар ортидан компания акцияларига бўлган талаб ортган: маҳаллий KASE биржасида Kaspi.kz акциялари 6,3 фоизга ўсганлиги қайд этилди.

Эслатиб ўтамиз, Kaspi.kz онлайн тўловлар, P2P ўтказмалар, шахсий молияни бошқариш ва маркетплейс хизматларини кўрсатувчи Қозоғистоннинг энг йирик экотизимидир. 2026 йил 1 апрель ҳолатига кўра, компаниянинг асосий акциядорлари Baring Funds (22,3%), Михаил Ломтадзе (23,04%) ва Вячеслав Ким (20,75%) эди. Битимдан сўнг ҳам Baring компаниянинг йирик акциядори мақомини сақлаб қолади.

2025 йилнинг август ойида «Uzum» экотизими «FinSight Ventures» етакчи инвестори иштирокида Хитойнинг «Tencent» технологик корпорацияси ҳамда «VR Capital» халқаро инвестиция фондидан қарийб 70 миллион АҚШ доллари миқдорида сармоя жалб этганди. Мазкур битим Хитой IТ-гиганти ҳисобланган «Tencent»нинг Ўзбекистон бозорига, хусусан, маҳаллий компанияга киритган илк технологик инвестицияси сифатида қайд этилган эди.