Корпоратив ахборот ягона портали маълумотларига кўра, “Paynet” акциядорлик жамиятининг 2025 йил якуни бўйича 395,1 млрд сўм соф фойда олган. Компания соф фойдаси 2024 йилга нисбатан 113,6 млрд сўмга ёки 40 фоизга ошган.

Ўтган йил давомида АҚШ долларининг сўмга нисбатан ўртача курси 12576 сўм бўлганини ҳисобга олсак, компаниянинг йиллик соф фойдаси тахминан 31,4 млн АҚШ долларини ташкил қилган.

Ҳисоботда қайд этилишича, компания соф даромади 1,7 трлн сўмдан зиёдроқни ташкил этган (+53 фоиз). Шу билан бирга компания харажатлари кўпроқ — 59,3 фоизга ошиб, 1,29 трлн сўмга етган.

Ўтган йил мобайнида компания активлари икки баравардан кўпроққа ортган. Компаниянинг жами активлари 2026 йил бошида 1,7 трлн сўмни ташкил қилган.

Аввалроқ Paynet компаниясининг 2025 йилнинг I чораги, ярим йиллиги, тўққиз ойлигидаги соф фойдаси ҳақида ёзган эдик.

Январда Paynet банк секторига киришни режалаштираётгани ҳақида хабар берилганди.