«Ўзсаноатқурилишбанк» АТБ (SQB) Кузатув кенгашига Молдова Миллий банкининг собиқ раиси Сержиу Чокля раислик қилади. У 5 октябрда акциядорлар томонидан Кенгашнинг мустақил аъзоси этиб сайланган, 15 октябрда эса Кенгаш қарори билан унинг раиси этиб тайинланди. Номзод Марказий банк билан келишилиши лозим.

Сержиу Чокля банк бошқаруви, молиявий тартибга солиш, инвестициявий банкинг ва халқаро капитал бозорлари соҳасида 25 йилдан ортиқ тажрибага эга.

2016–2018 йилларда у Молдова Миллий банкига раҳбарлик қилган. Бу даврда регулятор банк тизими барқарорлигини мустаҳкамлаш, молиявий назоратни кучайтириш ва банклар фаолияти шаффофлигини ошириш бўйича чоралар кўрган. Жумладан, Молдова Миллий банкида мустақил аъзолар кўпчиликни ташкил этадиган икки поғонали бошқарув тизими жорий этилган, мамлакатнинг йирик тижорат банкларига хорижий стратегик инвесторларни жалб қилиш бўйича битимлар назорат қилинган.

Шу йилларда С. Чокля Молдованинг Халқаро валюта жамғармасидаги бошқарувчиси ҳамда Европа тикланиш ва тараққиёт банкидаги (ЕТТБ) бошқарувчи ўринбосари вазифаларини ҳам бажарган.

Ундан олдин у қарийб 20 йил Франциянинг BNP Paribas банк гуруҳида корпоратив молия ва инвестициявий банкинг йўналишларида раҳбарлик лавозимларида ишлаган. Бу даврда умумий қиймати 30 млрд доллардан ортиқ бўлган 70 га яқин қўшиб олиш, бирлашиш ва хусусийлаштириш битимларида маслаҳатчи сифатида иштирок этган.

Банкнинг таъкидлашича, янги раиснинг корпоратив бошқарув, халқаро инвестиция битимлари ва хусусийлаштириш бўйича тажрибаси Ўзсаноатқурилишбанкни хусусийлаштиришга тайёрлаш жараёнида қўл келади.

Кузатув кенгашидаги ўзгаришлар

Сўнгги йилларда SQB Халқаро молия корпорацияси (ХМК), ЕТТБ ва бошқа халқаро ҳамкорлар билан биргаликда фаолиятини ислоҳ қилиш дастурини амалга оширди. Унинг доирасида корпоратив бошқарув, риск-менежмент, ғазначилик, бизнес йўналишлари ва рақамли технологиялар каби 20 дан ортиқ йўналишда халқаро амалиётлар жорий этилди.

Хусусан, Кузатув кенгаши таркиби янгиланди: унинг 11 нафар аъзосидан 8 нафари мустақил аъзолардир. Бу Кенгашнинг қарийб 73 фоизини ташкил этади. PwC компанияси томонидан ўтказилган мустақил баҳолашда банкнинг корпоратив бошқарув тизими 91 фоиз деб баҳоланган.

Кузатув кенгашининг янгиланган таркиби

Мустақил аъзолар – 8 нафар:

• Сержиу Чокля – Молдова Марказий банкининг собиқ раиси (2016–2018 йиллар);
• Юлия Айзуп – молия ва банк секторида 23 йилдан ортиқ тажрибага эга, Сбербанкнинг Шарқий Сибирь банки ва KPMGда ишлаган;
• Фердинанд Виллем Туинстра – ABN AMRO, Rabobank, Intesa Sanpaolo ҳамда IFC/Жаҳон банки тузилмаларида фаолият юритган, Литванинг UAB Travel Union компанияси кузатув кенгаши аъзоси;
• Георги Чиладзе – Грузиянинг Digital Area компанияси кузатув кенгаши раиси;
• Ольга Ульянова – 2007–2022 йилларда Moody’sнинг Москва бўлимида вице-президент, катта кредит мутахассиси;
• Умид Аҳмедов – Даниянинг Danske Commodities компаниясида маълумотларни қайта ишлаш ва таҳлил директори;
• Ханс Кристоф Манголд – Германиядаги Mangold Land & Forst GmbH & Co. KG, Mangold Consulting GmbH, Mangold Invest GmbH ва Digital Forst GmbH компанияларининг бошқарувчи директори;
• Сайёра Аюпова – «Инарктика» ОАЖ (Россия) Кузатув кенгашининг мустақил аъзоси, Стратегия қўмитаси раиси, Тайинлаш ва мукофотлаш қўмитаси аъзоси, «Kompass Directors» МЧЖ (Ўзбекистон) бошқарувчи ҳамкори ҳамда «Montfort CA» (Ўзбекистон) операцион директори.

Акциядорлар вакиллари – 3 нафар:

• Улуғбек Мухтаров – Тикланиш ва тараққиёт жамғармаси ижрочи директори ўринбосари;
• Зуҳриддин Ибрагимов – Иқтисодиёт ва молия вазирлиги Фискал хатарларни баҳолаш бошқармаси бошлиғи;
• Мэтью Джон Анселл – Franklin Templeton вакили, Ўзбекистон Миллий инвестиция жамғармасининг ишончли бошқарувчиси томонидан тақдим этилган номзод.

Кенгаш аъзоларининг касбий тажрибаси Ўзбекистон билан бир қаторда Европа ва МДҲ мамлакатларининг банк-молия секторларини қамраб олади.

Кенгаш қарорига кўра, 2024 йил январидан Кенгашга раислик қилиб келган Одилбек Исаковнинг ваколатлари муддатидан олдин тугатилди.

Одилбек Исаков ҳақида

^{Фото: Молия вазирлиги}

Одилбек Исаков 1981 йилда туғилган. Тошкентдаги Жаҳон иқтисодиёти ва дипломатияси университетида таҳсил олган. Буюк Британиянинг Манчестер Метрополитен университетида бизнес иқтисодиёти бўйича бакалавр (2002 йил), Стратклайд университетида молия бўйича магистр (2006 йил) даражаларини олган. CFA сертификатига эга.

Меҳнат фаолияти давомида Ўзбекистон Миллий банки, Манчестердаги Co-op Insurance Group суғурта компанияси ва Лондондаги HSBC банкида ишлаган. Хусусан, 2006–2018 йилларда HSBCда қарз капитали бозорлари йўналишида фаолият юритган.

2018 йил сентябрда Ўзбекистон Республикаси Молия вазирлигида вазир маслаҳатчиси – давлат суверен, корпоратив (банк) қарз мажбуриятлари ва давлат қарзи бошқармаси бошлиғи лавозимида иш бошлаган.

2019-2023 йилларда молия вазири ўринбосари лавозимида фаолият юритиб, халқаро кредит рейтинглари ва давлат қарзини бошқариш масалаларига масъул бўлган. Ушбу давр Ўзбекистоннинг халқаро капитал бозорига суверен еврооблигациялар билан чиқиши ва давлат қарзини бошқариш механизмлари такомиллаштирилиши билан ҳам аҳамиятлидир.

2023 йилдан «Infrasia Capital» консалтинг компанияси бош директори сифатида фаолият юритган. Шу йилнинг сентябрида Иқтисодиёт ва молия вазирининг давлат қарзи, халқаро рейтинглар ва давлат-хусусий шериклик масалалари бўйича маслаҳатчиси этиб тайинланган.

2019 йил августидан 2024 йил январигача «Микрокредитбанк» АТБ Кузатув кенгашига раислик қилган. Шундан сўнг SQB Кузатув кенгаши раиси лавозимини эгаллаган.

SQB акцияларининг 40 фоизи Franklin Templeton бошқарувидаги Ўзбекистон Миллий инвестиция жамғармасига (UzNIF) тегишли. 2026 йил май ойида UzNIF ўз қимматли қоғозларини Лондон фонд биржасида жойлаштирган.