Жанубий Кореянинг Maeil Business Newspaper нашрининг хабар беришича, KDB хориждаги барча 25 та бўлинмаси фаолиятининг самарадорлигини қайта кўриб чиқишни бошлаган. Ҳозирда банк хорижда 7 та шўъба банк, 12 та филиал ва 6 та ваколатхонага эга. Жорий йил бошида рухсат олинган ва очилиш арафасида турган Вьетнамнинг Ханой шаҳридаги филиал билан бу рақам 26 тага етади. Таққослаш учун, KDB'нинг Кореянинг ўзидаги филиаллари сони 60 та.

Нашринг ёзишича, кўп йиллардан буён ишлаётган, лекин фаолиятни кенгайтириш имконияти йўқлиги сабабли филиалга айлантириб бўлмаётган ваколатхоналар, шунингдек, қўшимча ўсиш истиқболи аниқ бўлмаган шўъба банк ва филиаллар қайта кўриб чиқилади. Бир минтақада бир нечта бўлинма жойлашган бўлса, уларнинг вазифаларини битта таянч бўлинмага бирлаштириш ҳам муҳокама қилинмоқда. Натижада хориждаги бўлинмалар умумий сони қисқариши мумкин. Хусусан, 2013 йилда очилган, бироқ 13 йил давомида филиал мақомини ололмаган Москва ва Абу-Даби ваколатхоналари қисқартириладиган бўлинмаларнинг асосий намунаси сифатида кўрилмоқда.

Аксинча, ўсиш салоҳияти юқори минтақаларда фаолият кучайтирилади. Масалан, Австралиянинг Сидней шаҳридаги ваколатхона филиалга айлантирилмоқда. Мамлакат ҳукумати инфратузилмага сармоя киритишда давом этаётгани ва табиий ресурсларни ўзлаштиришга талаб юқорилиги сабабли у ерда лойиҳавий молиялаштириш (PF) бозори кенгаймоқда.

Корея тижорат банклари фаол кириб келаётган бозорларда эса KDB'га тегишли бўлинмаларни сотиш варианти ўрганилмоқда, Ўзбекистон ҳам шулар жумласидан ҳисобланади. Нашрнинг ёзишича, KDB Тошкентда 2006 йилда Daewoo гуруҳига қарашли «УзДэу банк»ни сотиб олиш орқали фаолият бошлаган ва ўшандан буён сезиларли натижага эришмаган. Айни пайтда Корея банклари мамлакатга кириб келишни тезлаштирган.

Нашр KDB'нинг хориждаги тармоғини қайта ташкил этишини ҳукуматнинг давлат ташкилотлари самарадорлигини ошириш сиёсати билан боғлайди. Президент Ли Чжэ Мён ҳукумати ўхшаш вазифаларни бажарадиган ташкилотларни бирлаштириш каби ислоҳотларни амалга оширмоқда. Корея Молия ва иқтисодиёт вазирлиги эса давлат ташкилотларининг хориждаги ваколатхоналарини бир жойга жамлаш режасини илгари сурмоқда. Дастлаб бу АҚШ, Вьетнам, Кения ва Дубай каби бешта ҳудудда амалга оширилиши режалаштирилган.

Ўзбекистон бозорини яхши биладиган молия сектори вакилининг сўзларига кўра, «KDB хориждаги портфелини қайта мувофиқлаштириш жараёнида Ўзбекистондаги шўъба банкини сотишни кўриб чиқмоқда, асосий харидор мамлакатга кираётган Корея банклари бўлади». Инвестиция банкинги соҳаси вакили эса KDB бу борада Shinhan Bank ва Hana Bank'нинг қизиқишини ўрганиш учун сўров ўтказганини айтган. «Банк ичида сотишга қарши фикрлар ҳам бор, шунинг учун қандай қарор қабул қилинишини кутиш керак», — деган банк вакили. KDB'нинг ўзи эса аниқ қарор ҳали қабул қилинмаганини маълум қилган.

Потенциал харидорлар кимлар бўлиши мумкин?

Яқинда Shinhan Bank Ўзбекистонда шўъба банк очишга тайёрланаётгани маълум бўлганди. Банк апрель ойида бу бўйича ички қарорни маъқуллаган ва фаолиятни 2027 йилда бошлашни режалаштирмоқда. Сентябрь ойида Президент Шавкат Мирзиёев Жанубий Кореяга ташрифи чоғида Shinhan Financial Group раиси Жин Ок Дон билан учрашган чоғида ҳам ушбу масала кун тартибида бўлган.

Корейс банки Hana Bank эса 11 сентябрь куни Инвестициялар, саноат ва савдо вазирлиги билан инвестиция ва молия соҳасида ҳамкорлик бўйича англашув меморандуми имзолаган ва йил охиригача Ўзбекистонда ваколатхона очишни режалаштирмоқда.

Яна бир Корея давлат банки — Корея экспорт-импорт банкининг ҳам Ўзбекистонда ваколатхонаси бор.

KDB Bank Uzbekistan ҳақида

KDB Bank Uzbekistan маълумотига кўра, банк акцияларининг 86,32 фоизи KDB'га, 10,31 фоизи Ўзмиллийбанкка, 3,37 фоизи Туронбанкка тегишли. Банк бош офис ва иккита филиал орқали фаолият юритади. 2025 йил охирида унда 249 нафар ходим ишлаган.

«Пик Скартариса» телеграм-канали ёзишича, банкнинг жисмоний шахс мижозлари деярли йўқ, у асосан Ўзбекистон билан ишлайдиган хорижий компанияларга хизмат кўрсатади. Банкнинг аудитдан ўтган молиявий ҳисоботидаги рақамлар ҳам унинг корпоратив йўналишини кўрсатади. 2025 йил охирида 2 триллион 819 миллиард сўмлик кредит портфелининг атиги 8,7 миллиард сўми (0,3 фоизи - таҳр.) жисмоний шахсларга тўғри келган.

Ҳисоботга кўра, 2025 йил якунида банк активлари 13 триллион 117 миллиард сўмга (+29%), капитали 2 триллион 552 миллиард сўмга етган. Йиллик соф фойда 689 миллиард 922 миллион сўмни (+31,7%.) ташкил этган. Бу капитал рентабеллиги (ROE) қарийб 30 фоиз эканини англатади.

2025 йилни банк 691,1 миллиард сўм соф фойда билан якунлаган ва бу кўрсаткич бўйича банклар орасида 9-ўринни эгаллаган. Жорий йилнинг биринчи ярмида унинг соф фойдаси 403,4 миллиард сўмни ташкил этган (10-ўрин).

Эслатиб ўтамиз, KDB 2011 йил декабрида Royal Bank of Scotland гуруҳининг Ўзбекистондаги шўъба банки — «RBS NB Uzbekistan»нинг 82,35 фоиз улушини сотиб олган эди. Ўшанда 2010 йил охиридаги активлари 330 миллион долларни ташкил этган бу банкни мавжуд шўъба банк билан бирлаштириб, мамлакатдаги энг йирик хорижий банкни ташкил этиш режалаштирилган эди. Икки банк 2014 йилда KDB Bank Uzbekistan номи остида бирлаштирилган.