"Миллий банклараро процессинг маркази" АЖ (HUMO тўлов тизими) "New Industrial Technologies" МЧЖ билан йирик миқдорда битим имзолади. Бу ҳақда компания томонидан Корпоратив ахборот ягона порталида маълум қилинди.

Хабарга кўра, HUMO тўлов тизими New Industrial Technologies компаниясига 205 млрд сўм бериш бўйича қарз (заём) шартномаси имзолаган. Битим қиймати компания соф активларининг 24,6 фоизини ташкил қилади. Битим имзоланишидан олдинги ҳисобот даврида (2026 йил I чорак) HUMO'нинг активлари қиймати 946,2 млрд сўмни, соф активлари қиймати эса 831,6 млрд сўмни ташкил қилган.

"New Industrial Technologies" МЧЖ 2019 йил 8 апрелда ташкил этилган. Устав капитали 273,56 млрд сўм. Таъсисчиси Абдурахманов Мустафа Оразбаевич (100%), "Paynet" АЖ Кузатув кенгаши раиси. New Industrial Technologies 2024 йил апрелда Paynet тўлов ташкилотининг эгасига айланган. Ўз навбатида 2025 йилнинг январида "Paynet" АЖнинг Миллий банклараро процессинг марказини 65 млн АҚШ долларига сотиб олиши билан HUMO ва New Industrial Technologies бир-бирига аффилланган.