Ўзбекистонда олтин қуймалар нархи яна рекордни янгилади. Хусусан, 22 апрель учун 5 граммлик олтин қуймалар нархи бир кунда 192 минг сўмга ошиб, 7 млн 467 минг сўм этиб белгиланди. Аввалроқ, 17 апрель куни мазкур қуймалар нархи 7,2 млн сўмдан ошиб, рекорд қайд этганди.

^{Манба: Марказий банк}

2024 йилнинг 22 апрель куни 5 граммлик олтин қуйма нархи 4 млн 959 минг сўмга тенг бўлганди. Йиллик ўсиш 2,5 млн сўмни ёки 50,5 фоиздан кўпроқни ташкил қилди. Бундай йирик ўсиш Ўзбекистонда мавжуд бошқа инвестиция воситаларига (кўчмас мулк, сўмдаги депозитлар) нисбатан анча юқори ҳисобланади.

Глобал миқёсда олтиннинг қимматлаши фонида Ўзбекистон халқаро захиралари ҳам рекорд даражада ошди. Жумладан, 2025 йилнинг март ойида олтин нархларининг қимматлаши захираларга 3,59 млрд долларлик ижобий таъсир кўрсатиб, захиралар ҳажми 47,85 млрд долларни ташкил этди.

Глобал миқёсда олтин нархининг ошиши

Gold Price маълумотларига кўра, 22 апрель санасига 1 троя унцияси учун олтин нархи 3 480 долларни ташкил қилмоқда. 

Reuters'нинг хабар беришича, АNZ йил якуни бўйича олтин нархи прогнозини унцияси учун 3600 долларга ва олти ойлик прогнозини аввалги 3200 доллардан 3500 долларга кўтарди.

"Чуқурроқ турғунлик хавфининг кучайиши, геосиёсий ландшафтдаги навбатдаги бурилиш, глобал таъминот занжирларидаги узилишлар, инфляциянинг кўтарилишидан қўрқиш ва ўзгарувчан ставка прогнози олтин яқин келажакда мустаҳкам туришидан далолат беради", деб таъкидлаган АNZ.

Аввалроқ, "Bloomberg" эълон қилган мақолада учинчи чоракка келиб олтин нархининг бир унцияси 3500 долларга етиши прогноз қилинган эди.