Марказий банк 14 март кунги олтин қуймалари нархини эълон қилди. Унга кўра, беш граммлик олтин қуймасининг нархи рекорд ўрнатиб, 6,36 млн сўмдан ошди. Олтин нархи бир кун ичида 99 минг сўмга ёки 1,58 фоизга қимматлашган. 

Шунингдек, ўн граммлик қуймаларнинг нархи 12 млн 724 минг сўмдан, йигирма граммликники — 25 млн 449 минг сўмдан 50 ва 100 граммлик барларнинг нархи эса мос равишда 63 млн 622 минг сўм ва 127 млн 244 минг сўмдан ошди.

^{Инфографика: Марказий банк}

Дунё бозорида олтин нархи тарихда биринчи марта троя унцияси учун қарийб 3 минг долларга етди. "Reuters" агентлигининг ёзишича, бундай вазият юқори тариф ноаниқлиги ва АҚШ Федерал захираси томонидан пул-кредит сиёсатини юмшатишга қаратилган чоралар туфайли юзага келган.

Олтин нархи 2024 йилда 27 фоизга мустаҳкамланган бўлса, жорий йил бошидан буён ўн икки марта рекорд ўрнатиб, деярли 14 фоизга ошган.

"Bloomberg" эълон қилган мақолага кўра, учинчи чоракка келиб, олтин нархининг бир унцияси 3500 долларга етиши прогноз қилинмоқда.