Ўзбекистонда олтин қуймалар нархи рекордни янгилади. Хусусан, 14 апрель учун 5 граммлик олтин қуймалар нархи 6 млн 937 минг сўм этиб белгиланди. Аввалроқ, 2 апрель куни мазкур қуймалар нархи 6,7 млн сўмдан ошиб, рекорд қайд этганди.

^{Манба: Марказий банк}

Олтин нархлари 14 мартга нисбатан 9 фоизга қимматлади. 2024 йилнинг 14 апрель куни 5 граммлик олтин қуйма нархи 4 млн 987 минг сўмга тенг бўлганди. Йиллик ўсиш 39 фоиздан кўпроқни ташкил қилди. Масалан, ўтган йилнинг 14 апрелида олтин харид қилган шахс ҳозирги нархлар билан 1,95 млн сўм фойда қилди. Бундай йирик ўсиш Ўзбекистонда мавжуд бошқа инвестиция воситаларига (кўчмас мулк, сўмдаги депозитлар) нисбатан анча юқори ҳисобланади.

Бундан ташқари, олтин нархларининг ўсиши Ўзбекистон халқаро захиралари ортишига ўз ҳиссасини қўшмасдан қолмайди. Жумладан, 2025 йилнинг январь ойида олтин нархларининг қимматлаши захираларга 2,27 млрд долларлик ижобий таъсир кўрсатган.

14 апрель куни олтин глобал бозорларда ҳам рекордларни янгилади. Хусусан, ўтган ҳафтада қимматбаҳо металнинг троя унцияси учун нархи 3245 долларгача ошди. Мазкур хабар нашр қилинаётган вақтда олтиннинг глобал нархи 1 троя унцияси учун 3214,2 долларни ташкил қилди.

^{Манба: Trade Economics}

Глобал миқиёсда олтин нархининг ўсишига таъсир қилувчи омиллар:

1. Геосиёсий беқарорлик: Глобал инқироз ва можаролар (Россия–Украина уруши, Яқин Шарқдаги кескинлик) сабабли инвесторлар хавфсиз актив сифатида олтинни танламоқда.

2. АҚШ Федерал захира тизими (FED) сиёсати: АҚШ фоиз ставкаларининг ўзгариши олтин нархига бевосита таъсир кўрсатади. Фоиз ставкалари юқори бўлса, инвесторлар облигацияларга қизиқиш билдиради, паст бўлса олтинга талаб ошади. Шунингдек, олтин АҚШ президенти Доналд Трaмпнинг савдо сиёсати ва жаҳон савдосидаги кескинликнинг кучайиши фонида энг даромадли активга айланди.

3. Марказий банкларнинг захираларни ошириши: Сўнгги йилларда Россия, Хитой ва бошқа давлатлар ўз олтин захираларини кенгайтиришга ҳаракат қилмоқда. Бу эса нархларни янада оширишга туртки бўлади.

Аввалроқ, Марказий банк 100 граммлик олтин қуймаларини сотувга чиқаргани ҳақида маълумот берган эдик.