"Ягона умумреспублика процессинг маркази" АЖ (UZCARD тўлов тизими) 2024 йил якунлари бўйича аудитланган молиявий ҳисоботини эълон қилди.

Унга кўра, йил давомида компаниянинг соф фойдаси 955,7 млрд сўмни ташкил қилган. Бу 2023 йилга нисбатан 62,9 фоизга ёки 368,9 млрд сўмга кўпроқдир.

Маълумот учун, 2024 йил якуни бўйича Ўзбекистонда фақатгина 4 та банк — Ўзмиллийбанк, Hamkorbank, Ўзсаноатқурилишбанк ва Капиталбанклар бундан кўпроқ соф фойда олган.

Компания тушуми 2024 йилда 1,3 трлн сўмга тенг бўлган. Активлари эса 199,4 млрдга ёки 37 фоизга ошган ва жами 736,2 млрд сўмга етган. Шунингдек, UZCARD'нинг жами капитали 590,6 млрд сўмгача ошган.

Шу билан бирга, компания мажбуриятлари икки баробарга ортган ва жами 145,7 млрд сўмни ташкил этган.

Мазкур кўрсаткичлар мустақил аудиторлик ташкилоти "Ernst and Young" компанияси хулосасидан кейинги ҳисоботдан олинган.

2024 йилнинг 31 декабрь ҳолатида UZCARD акциядорларининг улуши қуйидагича:

• "IMC Capital" МЧЖ — 75%;
• Камрон Анварович Акбаров — 25%.

"IMC Capital" МЧЖнинг ягона таъсисчиси Berill Holding Company Limited, унинг таъсисчиси эса Emerald Global Foundation ҳисобланади. Шундай қилиб, Emerald Global Foundation ва Камрон Акбаров биргаликда компанияга эгалик қилади.

Аввалроқ, UZCARD тўққиз ойда 660 млрд сўмдан кўпроқ соф фойда олгани маълум бўлганди.

Эслатиб ўтамиз, HUMO тўлов тизимининг 2024 йил якунлари бўйича соф фойдаси 168,3 млрд сўмни (тахминан 13 млн АҚШ долларини) ташкил қилган ва 2023 йилдагига нисбатан қарийб 54 млрд сўмга ёки 47 фоизга кўп соф фойда олганлиги маълум бўлганди.