2025 йилнинг 4 февраль куни “Капиталбанк” АТБ Кузатув кенгаши бошқарув таркибини кенгайтириш тўғрисида қарор қабул қилди. Қарорга кўра, банк бошқаруви раисининг ўринбосари лавозимига Улуғбек Ўктамович Таваккалов тайинланди.

“Капиталбанк” АТБ бошқаруви раиси ўринбосари сифатида Улуғбек Таваккалов банкнинг чакана йўналишини стратегик ривожлантириш ва мижозлар учун молиявий маҳсулотлар яратишга эътибор қаратади.

"Жорий йилда биз хизматлар сифати масаласига алоҳида эътибор қаратамиз. Улуғбекнинг тажрибаси ва билими банкнинг ривожланиши, хизматлари ва имкониятларини кенгайтириш, шунингдек, бозор позицияларини мустаҳкамлашга катта ҳисса қўшади. Ишончим комилки, у янги лавозимда банк ва мижозлар учун янада кўпроқ ишларни амалга оширади", деди “Капиталбанк” АТБ Кузатув кенгаши Раиси Мақсуд Абдусамадов.

Улуғбек Таваккаловнинг тайинлови Ўзбекистон Республикаси Марказий банки томонидан тасдиқлангандан сўнг кучга киради.

Маълумот учун, Улуғбек Таваккалов (1978 йилда туғилган) 2000 йилда Россия давлат сервис университетини "Бухгалтерия ҳисоби ва аудит" мутахассислиги бўйича, 2013 йилда Тошкент Молия институтининг "Банк иши" йўналиши бўйича бакалавриатини, 2016 йилда Тошкент давлат иқтисодиёт университетининг "Банк иши" мутахассислиги бўйича магистратурани тамомлаган.

Меҳнат фаолиятини 1997 йилда Тошкент шаҳар "Бизнес фонди" АЖнинг кредит ва мониторинг бўлими 1-тоифали мутахассиси лавозимида бошлаган. 2003-2019 йилларда "Ипак Йўли" АИТБда Мониторинг бўлими бошлиғи, Кредит портфели мониторинги бошқармаси бошлиғи, Чакана бизнес Департаменти бошлиғи лавозимларида ишлаган. 2019 йилнинг октябрь ойидан 2021 йил май ойига қадар "Ўзсаноатқурилишбанк" АТБ бошқарув раиси ўринбосари лавозимида фаолият юритган.

2021-2024 йилларда Tenge Bank бошқарув раиси ўринбосари лавозимида, 2024 йилнинг апрель ойидан ноябрь ойигача Мадад Инвест Банк бошқаруви раиси сифатида фаолият юритган.

Эслатиб ўтамиз, ўтган йилнинг ноябрь ойи бошида Улуғбек Таваккалов Мадад Инвест банк бошқаруви раиси лавозимидан кетгани ҳақида хабар берилганди. Кейинчалик у Капиталбанк Кузатув кенгаши раиси маслаҳатчиси сифатида фаолият олиб бораётган эди.