Вазирлар Маҳкамасининг 2024 йил 1 майдаги 256-сонли қарори билан тасдиқланган “Рақамли платформа операторининг устун мавқеини ва устун музокара кучини эътироф этиш тартиби тўғрисида”ги Низомда рақамли платформа операторининг устун мавқега эга деб эътироф этишнинг мезонлари белгиланган.

Ушбу Қарорга мувофиқ, қўмитанинг тегишли буйруғи билан онлайн тўлов тизимлари бозорида "Payme" АЖ устун мавқега эга рақамли платформа оператори деб эътироф этилди.

Бунга Payme томонидан онлайн тўлов тизимлари бозорида устун мавқега эришганлиги тўғрисида Рақобат қўмитасига тақдим этилган хабарномаси асос қилиб олинди.

Маълумот ўрнида, устун мавқе товар ёки молия бозоридаги ташкилотнинг ёхуд шахслар гуруҳининг унга ўз фаолиятини рақобатлашувчи ташкилотларга боғлиқ бўлмаган ҳолда амалга ошириш ва рақобатнинг ҳолатига ҳал қилувчи таъсир кўрсатиш, тегишли бозорга бошқа хўжалик юритувчи субъектларнинг киришини қийинлаштириш ёхуд ушбу бошқа субъектларнинг иқтисодий фаолият эркинлигини бошқача тарзда чеклаш имкониятини берадиган ҳолат ҳисобланади.

Хўжалик юритувчи субъектнинг ёхуд шахслар гуруҳининг бозордаги улуши 40 фоизни ва ортиқни ташкил этса, ёки ойлик фаол фойдаланувчилари 50 мингдан кўп бўлса, шунингдек, бошқа ҳолларда компания устун мавқега эга, деб топилади.

Ҳозирда "Товар ёки молия бозорида устун мавқега эга деб эътироф этилган хўжалик юритувчи субъектларнинг рўйхати"да Ўзмиллийбанк, Агробанк, "Ягона умумреспублика процессинг маркази" АЖ, "Ўзбекистон Республикаси Марказий банкининг Республика Инкассация хизмати" ДУК каби банкка алоқадор ташкилотлар бор.

Иқтисодчи Отабек Бакиров мазкур рўйхатда HUMO хусусийлаштирилганидан кейин бир неча секторларда уникал позицияларни эгаллаган Paynet компания қўшилмаганига эътибор қаратган.

Эслатиб ўтамиз, июль ойидан Payme савдо белгиси эгаси "Inspired" МЧЖнинг мулкчилик шакли акциядорлик жамиятига айлантирилди ва "Payme" АЖ номига ўзгартирилди.

Payme тўққиз ой якуни бўйича қарийб 187 млрд сўм соф фойда олгани ҳақида хабар берган эдик. Мазкур кўрсаткич билан компания 2023 йилнинг мос даврига нисбатан 22,19 фоизга ёки 33,95 млрд сўмга кўпроқ соф даромад қилди ва асосий рақобатчиси Click'ни ортда қолдирди.