Россиянинг 15 та банки халқаро SWIFT тизимидан узиб қўйилиши мумкин. Бу Европа Иттифоқининг Россияга қарши 16-санкциялар пакетида кўрсатилган, дея хабар берди Bloomberg нашри.

"Настоящее Время" ва "Озодлик" радиосининг Система суриштирув лойиҳаси хабарига кўра, ушбу 15 та банк ичида Ўзмиллийбанкнинг Россиядаги шўъба банки - Азия-Инвест банк ҳам бор.

Европа Иттифоқининг халқаро алоқалар ва хавфсизлик сиёсати бўйича вакили ҳақиқатдан ҳам Россияга қарши янги санкциялар пакети тайёрланаётганини таъкидлаган. Унинг сўзларига кўра, санкциялар пакети февраль ойида эълон қилиниши учун ҳаракат қилинмоқда.

Азия-Инвест Банк – 1996 йил ташкил топган, 100 фоизлик улуши Ўзмиллийбанкка тегишли бўлиб, Россия ва Ўзбекистон ўртасидаги савдо айланмасига хизмат кўрсатувчи ихтисослашган молия институти ҳисобланади.

2022 йилнинг март ойида Россиянинг еттита банки SWIFT тизимидан узиб қўйилгандан сўнг мазкур банк Ўзбекистон давлат банкларининг Россия билан пул ўтказмаларида асосий корреспондент банкка айланган. Ҳозирга қадар Азия-Инвест банк ҳеч қандай халқаро санкциялар рўйхатига тушмаган.

2022 йилнинг феврал ойида Азия-Инвест Банк вакили Bankers.uz билан суҳбатда биринчи навбатда "Телекс" тизимини SWIFT учун муқобил вариант сифатида кўриб чиқаётганини маълум қилганди. Бундан ташқари, СПФС (Система передачи финансовых сообщений - Россия банклараро молиявий хабарлар ўтказиш тизими) тизимидан фойдаланиш чоралари кўрилаётганини таъкидлаганди.

Иқтисодчи Отабек Бакиров ўзбек банклари юзага келган эҳтимолий хатарларни ва оқибатларни инобатга олишлари лозимлиги ҳақида ёзди. Ўтган ҳафта бўлиб ўтган матбуот анжуманида МБ Раиси Тимур Ишметов санкциялар масаласига жиддий қаралаётгани ҳақида айтганди.

Аввалроқ, АҚШ Молия вазирлиги Россиянинг 50 дан ортиқ банкларини, шу жумладан энг йирик банкларидан бири — Газпромбанкни санкция қўлланадиган ташкилотлар рўйхати (SDN List)га киритди. Банк 2022 йил бошида Ўзбекистонда ўз ваколатхонасини очганди.

Эслатиб ўтамиз, 2023 йилнинг ноябрь ойидан "Азия Инвест банк" ЁАЖ бошқарув раиси этиб Ботир Аминович Рахматов тайинланганди.