1 ноябрдан фирибгарлик ҳолатларининг олдини олиш учун кредит ташкилотлари томонидан онлайн кредит ажратилишида вақтинчалик тартиб жорий этилганди. Марказий банк ушбу тартиб бўйича натижаларни очиқлади.

Мазкур тартибга кўра, биринчи марта онлайн кредит олган тақдирда, тушган пул маблағларига нисбатан кредит ажратилганидан бошлаб 48 соат давомида P2P амалиётлари, электрон ҳамёнларга ўтказмалар, чет элга пул ўтказмалари, онлайн валюта айирбошлаш ҳамда телефон рақами ҳисобини тўлдириш учун сарфланишига чеклов ўрнатилади.

Ушбу чекловларни ечиш учун фуқаро 48 соат ичида тижорат банки томонидан юборилган SMS-хабарда кўрсатилган телефон рақамига қўнғироқ қилиб, кредитни фирибгарлар таъсирисиз олганлигини маълум қилади. Банк ходими эса фуқарога қайта боғланиб, уни қўшимча тасдиқдан ўтказгач, чеклов олиб ташланади.

Регуляторнинг хабар беришича, ҳозирда вақтинчалик тартибда белгиланган талаблар доирасида 11 та тижорат банки ҳамда 1 та микромолия ташкилоти томонидан онлайн кредит (микроқарз) ажратиш йўлга қўйилган. Шу билан бирга, 9 та тижорат банки томонидан онлайн кредит ажратиш вақтинчалик тартибга мувофиқ йўлга қўйилгунига қадар мобиль илова орқали ушбу хизматни кўрсатиш тўхтатилган.

Мазкур вақтинчалик тартиб жорий этилгандан буён кредит ташкилотлари томонидан ажратилган 285 млрд сўм миқдоридаги маблағлар мижоз кредит олишга аризани фирибгарлар таъсирида бериб, 48 соат давомида қўшимча тасдиқдан ўтмаганлиги ва маблағлари сарфланмаганлиги сабабли тижорат банки ҳисобига қайтарилди, дейилади Марказий банк хабарида.

Эслатиб ўтамиз, аввалроқ Марказий банк томонидан битта жисмоний шахсга эмиссия қилинадиган карталар сонини битта банкда 5 тагача, барча банкларда 20 тагача чеклаш бўйича вақтинчалик тартиб ишлаб чиқилгани маълум бўлганди. Тартиб 2025 йилнинг 1 январидан 31 декабрига қадар амал қилади.