Декабрь ойининг 11-санасида Марказий банк раиси этиб тайинланган Тимур Ишметов хусусий ва чет эл капитали иштирокидаги тижорат банклари раҳбарлари билан учрашув ўтказди, деб хабар бермоқда регулятор ахборот хизмати.

Йиғилиш давомида Ўзбекистон Президенти томонидан банк тизими олдига қўйилаётган устувор вазифалар ва келгусида амалга оширилиши кутилаётган ишлар юзасидан фикр алмашилган.

"Учрашувда рақамли банк хизматларини ривожлантириш, микро ва кичик бизнес учун янги банк маҳсулотларини жорий этиш, халқаро молия институтлари билан ҳамкорликни кенгайтириш, банк хизматлари оммабоплигини ошириш, кредитлаш тизимини такомиллаштириш ва бошқа долзарб масалалар муҳокама этилди", дейилади МБ хабарида.

^{Фото: Марказий банк}

Шунингдек, банк тизимининг норматив-ҳуқуқий базасини янада такомиллаштириш юзасидан амалий таклифлар атрофлича ўрганиб борилиши таъкидланди. Тадбирда иштирок этган банк раҳбарлари кредит маҳсулотлари турини кўпайтириш ҳамда кредит беришнинг скоринг-таҳлил тизимини яхшилаш юзасидан ўз таклифларини билдирди.

"Шу билан бирга, иштирокчилар аҳолининг молиявий саводхонлигини ошириш орқали уларнинг банк хизматларидан фойдаланиш кўламини кенгайтириш, киберхавфсизлик ва фирибгарликка қарши курашиш бўйича ўзаро фикр алмашишди", деб ёзмоқда регулятор ахборот хизмати.

Учрашув сўнггида Марказий банк раиси тижорат банклари раҳбарлари билан доимий очиқ мулоқотлар ўтказишга, соҳани янада яхшилаш борасида фикр алмашиш, таклифлари билан танишишга ҳамиша тайёрлигини билдирган.

^{Фото: Марказий банк}

Эслатиб ўтамиз, жорий йилнинг 11 декабрь куни Марказий банк раиси Мамаризо Нурмуратов лавозимидан озод этилган ва унинг ўрнига Президентнинг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчисининг биринчи ўринбосари лавозимида ишлаб келган Тимур Ишметов Марказий банк раиси этиб тайинланганди.