Бугун, 11 декабрь куни Олий Мажлис Қонунчилик палатасида кредит соҳасидаги муносабатларни янада такомиллаштиришга қаратилган қонун лойиҳаси биринчи ўқишда концептуал жиҳатдан кўриб чиқилди.

Мазкур қонун лойиҳасига кўра, жисмоний шахслар ўзларининг номига кредит олишга тақиқ қўйиши мумкин бўлади. Бу фуқароларнинг ўзининг иштирокисиз ёки хабардорлигисиз уларнинг номига кредит олиниши билан боғлиқ фирибгарликларнинг олдини олиш мақсадида амалга оширилиши айтилди.

Қонун лойиҳаси орқали кредит олишни ўзига тақиқлаган шахслар реестри жорий этилади.

“Хусусан, реестр Марказий банк томонидан белгиланган тартиблар асосида, кредит бюролари томонидан юритилиши, банклар ва нобанк кредит ташкилотларига реестрни текширмасдан туриб кредит ажратиш тақиқланиши, шунингдек, реестрга киритилган фуқароларга кредит ажратилганлик учун кредит битими бўйича келиб чиқадиган оқибатларга жавобгарлик белгиланмоқда”, ─ деди Марказий банк раиси ўринбосари Аброрхўжа Турдиалиев.

Реестрга киритилган шахс кейинчалик банклардан кредит олишни хоҳласа, ушбу реестрдан чиқариш бўйича қайта ариза берган ҳолда кредит олиши мумкин.

Шунингдек, лойиҳада кредит бюролари базаларида катта ҳажмда маълумотлар сақланишини инобатга олган ҳолда, етарлича маблағлар шакллантириши учун устав фондини минимал 2 млрд сўм миқдорида белгилаш таклиф этилди.

Бундан ташқари, Марказий банк томонидан кредит бюроларига нисбатан қоидабузарликлар учун қўлланиладиган чоралар ва санкциялар белгиланмоқда. Хусусан, лойиҳада кредит бюроларига қоидабузарликларни бартараф этиш тўғрисида ижро этилиши мажбурий бўлган кўрсатмалар юбориш ҳамда БҲМнинг 5 минг бараваригача бўлган миқдорда жарима ундириш назарда тутилмоқда.

Қонун лойиҳаси биринчи ўқишда депутатлар томонидан қабул қилинди.

Аввалроқ, регулятор банклар томонидан битта жисмоний шахсга карталар сонини вақтинчалик битта банкда 5 тагача, барча банкларда 20 тагача белгилаш масаласи кўриб чиқилаётганини маълум қилганди. 

Эслатиб ўтамиз, 1 ноябрдан бошлаб фирибгарлик ҳолатларининг олдини олиш учун онлайн кредитлаш бўйича вақтинчалик тартиб жорий этилганди.