АТ «Халқ банк» нинг шўъба корхонаси ҳисобланувчи «Xalq Sug‘urta» АЖнинг 100 % улуши Давлат активларини бошқариш агентлигига ўтказилди. Тегишли қарор Халқ банки Кузатув кенгаши томонидан 2026 йил 21 сентябрда қабул қилинган. 

Ўзгаришдан сўнг Халқ банки 10% ва ундан ортиқ эгалик қиладиган компаниялар сони 5 тани ташкил қилган. Булар: «Xalq Lizing» МЧЖ (100%), «Xalq Faktoring» МЧЖ (100%), «Xalq mikromoliya tashkiloti» МЧЖ (100%), «United Venchures» МЧЖ (14%) ҳамда «Perfect capital investment» МЧЖ (100%).

Xalq Sug‘urta компаниясининг номинал қиймати 1 000 сўм бўлган 80 млн дона акцияси ёки умумий қиймати 80 млрд сўмлик улуш Давактивга ўтказилган.

Xalq Sug‘urta 2026 йил 28 августдаги Президентнинг «Иқтисодиётда давлат иштирокини қисқартириш ва хусусийлаштириш жараёнларини жадаллаштириш бўйича қўшимча чора-тадбирлар тўғрисида» ги ПФ-177 сонли фармонига биноан хусусийлаштириладиган активлар қаторига киритилган эди. Шу муносабат билан суғурта компаниясининг 100% улуши Халқ банкидан Давактивга ўтказилган.

2026 йилнинг 1 июль ҳолатига кўра, Xalq Sug‘urta 278,54 млрд сўмлик активларга эгалик қилади. Устав капитали 80 млрд сўм. Ҳисобот даврида тақсимланган фойдаси 15,42 млрд сўмни ташкил қилган. Компания жорий йилнинг январ-июн ойларида 30,12 млрд сўм даромад олган. Шундан 15,42 млрд сўми соф фойда ҳисобланади.