«Invest Finance Bank» АЖ (InFinBank) акциядорларининг 8 октябрда бўлиб ўтган навбатдан ташқари умумий йиғилишида банк кузатув кенгаши аъзоси Шуҳрат Мирзараҳимовнинг ваколатларини муддатидан илгари тугатиб, унинг ўрнига мустақил аъзо - Ботир Қобиловни сайлади.

Йиғилиш баёнига кўра, Ш.Мирзараҳимов кенгаш таркибидан ўз хоҳишига кўра чиқиш ҳақида ариза берган. У кенгашга 30 июндаги йиллик умумий йиғилишда уч йил муддатга сайланган эди. Б.Қобилов номзоди эса 14 сентябрда кенгашнинг мустақил аъзолигига уч йил муддатга таклиф қилинган. «Банк фаолиятига рухсат бериш тартиби ва шартлари тўғрисида»ги низомга мувофиқ, кенгаш аъзолигига номзод Марказий банк билан келилиши лозим бўлади.

Янгиланган кузатув кенгаши беш нафар аъзодан иборат бўлади.

Ботир Қобилов ҳақида

Ўзбекистонлик иқтисодчи. Тошкентдаги Сингапур менежментни ривожлантириш институтида (MDIS) таҳсил олган ва институтнинг ҳамкори бўлган Уэльс университетининг банк иши ва молия йўналиши бўйича биринчи даражали имтиёзли бакалавр даражасини олган.

Фаолиятини Ўзбекистонда бошлаган: Ислом тараққиёт банки, «Ипак Йўли» банки ва Марказий банкда ишлаган, Марказий банкда бош иқтисодчи бўлган. 2014 йилда грант асосида АҚШнинг Дьюк университетига иқтисодиёт бўйича магистратурага ўқишга кирган ва профессорларнинг тадқиқот лойиҳаларида ассистент бўлиб ишлаган. Магистратурадан кейин уч йил Гарвард бизнес мактабида тадқиқотчи бўлиб ишлаган, сўнг шу ерда докторантурада ўқишни давом эттирган.

2020 йилда Гарвард учун Ўзбекистон ҳақида ёзилган илк тўлиқ кейс-тадқиқотнинг ҳаммуаллифи бўлган. 2024 йилда Гарвард бизнес мактабида «Молия бозори ва иқтисодиётда ахборот ва маълумотларнинг роли» мавзусида докторлик диссертациясини ёқлаган. У бу мактабда диссертация ёқлаган илк ўзбекистонлик бўлган.

Ботир Қобиловнинг шахсий сайтига кўра, 2024 йилдан Техас университетининг Даллас кампусида бухгалтерия ҳисоби бўйича ассистент-профессор. Илмий йўналишлари — ахборотни қайта ишлаш, технологияларни жорий этиш, молия ва давлат секторидаги тартибга солиш ва ижро, ривожланаётган иқтисодиётларда бухгалтерия ҳисоби.

Б.Қобилов Марказий банк Жамоатчилик кенгашининг аъзоси. Шунингдек, иқтисодчи Беҳзод Ҳошимов билан бирга Uzbekonomics Telegram канали ва подкастини юритади.

2023 йил 19 сентябрда Президент Шавкат Мирзиёевнинг АҚШга ташрифи доирасида у ерда яшаётган ўзбекистонликлар билан ўтказилган учрашувда Б.Ҳошимов билан бирга иштирок этган. Учрашувда Б.Қобилов «ақллар кетиши» мавзусини кўтариб, хорижда яшаётган ўзбекистонликлар сони ортиши Ўзбекистоннинг ўзига ҳам фойда келтиришини айтган. Президент бу фикрга «Тўппа-тўғри, 100 фоиз қўшиламан», деб жавоб берган.

^{Фото: Президент матбуот хизмати}

Эслатиб ўтамиз, Uzbekonomics подкастининг иккинчи бошловчиси Б.Ҳошимов сентябрь ойида Бизнесни ривожлантириш банки кузатув кенгашига мустақил аъзо сифатида сайланган эди.