Марказий банкнинг маълум қилишича пресс-релизга кўра, тангалар «Икки танга — бир Регистон» концепцияси асосида яратилган: олтин ва кумуш танга ёнма-ён қўйилганда Регистон майдони пештоқининг яхлит тасвири ҳосил бўлади.

Тангаларнинг аверсида Самарқанддаги Тиллакори мадрасасининг меъморий элементлари, шахмат доналари силуэти ва геометрик нақшлар тасвирланган. Олтин тангада «46-Бутунжаҳон Шахмат Олимпиадаси Самарқанд-2026», кумуш тангада эса «46th Fide Chess Olympiad Samarkand-2026» ёзуви жойлашган.

Реверс томонида марказий элемент сифатида Халқаро шахмат федерацияси (FIDE) логотипи туширилган. Шунингдек, олтин тангада «Ўзбекистон Республикаси Марказий банки», кумуш тангада «Central Bank of the Republic of Uzbekistan» ёзуви ва номинал қиймат кўрсатилган.

^{Шахмат олимпиадасига бағишланган кумуш эсдалик тангалари / Фото: Марказий банк}

Эсдалик тангалари 999,9 асилликдаги олтин ва кумушдан зарб этилади. Ҳар бир танганинг оғирлиги 31,1 грамм (бир трой унция - таҳр.), номинал қиймати 100 000 сўм. Тангалар дастлаб 100 дона олтин ва 500 дона кумуш нусхада чиқарилади. Марказий банк маълумотига кўра, бозор талаби ва коллекционерлар қизиқишидан келиб чиқиб, тираж босқичма-босқич оширилиши мумкин. Сотув санаси ва нархлари ҳозирча эълон қилинмаган.

Маълумот учун, 46-Бутунжаҳон шахмат олимпиадаси 15 сентябрда Самарқанддаги «Боқий шаҳар» мажмуасида очилган эди. Олимпиадани Ўзбекистонда ўтказиш тўғрисидаги қарор 2022 йилда Ҳиндистоннинг Ченнаи шаҳрида бўлиб ўтган FIDE конгрессида қабул қилинган. Ўзбекистон мезбон сифатида эркаклар ва аёллар турнирида учтадан жамоа билан қатнашмоқда.

Эслатиб ўтамиз, июнь ойида Марказий банк Ўзбекистон терма жамоасининг ЖЧ-2026'даги иштирокига бағишланган эсдалик тангаларини муомалага чиқарган эди. Ўшанда ҳам дастлаб 100 дона олтин ва 1000 дона кумуш танга режалаштирилган, бироқ юқори талаб сабаб тираж 500 дона олтин ва 3000 дона кумушгача оширилган. 18 июнь ҳолатига 31,1 граммли олтин танга 54,63 миллион сўмдан, кумуш танга 1,67 миллион сўмдан сотилган. Август охирида эса Мустақилликнинг 35 йиллигига бағишланган 450 дона олтин ва 800 дона кумуш танга сотувга чиқарилган.