Марказий банк томонидан футбол бўйича Ўзбекистон миллий терма жамоасининг “Жаҳон чемпионати - 2026”да иштирок этиши муносабати билан махсус эсдалик тангалари муомалага чиқарилади.

Марказий банкнинг маълум қилишича, "Ўзбекистон миллий терма жамоаси иштирокини тарихга муҳрлаш" мақсадида 999,9 аслликдаги соф олтин ва кумушдан эсдалик тангалари зарб этилди.

^{Фотоскрин: Марказий банк}

Эсдалик тангаларининг аверс қисмида Ўзбекистон футбол ассоциацияси логотипи, классик футбол тўпи чизмаси ҳамда “Тарихий зафар. Ўзбекистон футболи жаҳон чемпионатида - 2026” ёзуви акс эттирилган. Мазкур элементлар миллий терма жамоамизнинг илк мундиал йўлланмаси ва Ўзбекистон футболи тарихидаги янги саҳифани рамзий тарзда ифодалайди.

Тангалар дизайнида мухлислар орасида “Оқ бўрилар” номи билан танилган миллий терма жамоамиз рамзи ҳам ўрин олган. Реверс қисмидаги бўри силуэти футболчиларимизнинг шижоати, жамоавий руҳи ва таслим бўлмас характерини ифодалайди. Ушбу рамз 26 нафар футболчи силуэтини ўзида мужассам этиб, тарихий натижа бутун жамоанинг бирдамлиги ва меҳнати билан қўлга киритилганини англатади.

Шунингдек, танга дизайнида миллий терма жамоа либосидаги нақшлар кўҳна обидаларимиз деворларидаги нақшлардан олингани шонли тарихимиз ва бой маданиятимизни ифода этади. Бу ечим футбол, миллий ғурур ва аждодлар тарихини ягона композицияда бирлаштиради.

31,1 грамм оғирликдаги 100 та олтин ва 1000 та кумуш тангалар юқори бадиий ҳамда коллекцион қийматга эга бўлиб, чекланган миқдорда ишлаб чиқарилган.

Маълум қилинишича, эсдалик тангалари 18 июндан бошлаб 690 та тижорат банклари филиалларида сотувга чиқарилади.

Сотув нархлари ва банклардаги мавжудлик бўйича янгиланган маълумотлар Марказий банкнинг расмий веб-сайти ҳамда ижтимоий тармоқлардаги саҳифаларида ҳар куни эълон қилиб борилади.