"Tenge Bank" АТБ Кузатув кенгашининг 15 сентябрдаги қарори билан Жамшид Раҳматбоевич Хайруллаев мазкур банк бошқаруви раисининг биринчи ўринбосари этиб тайинланди. Ж.Хайруллаев номзоди тегишли тартибда Марказий банк билан келишилгандан сўнг, у мазкур лавозимда ўз вазифаларини бажаришга расман киришиши мумкин бўлади.

Жамшид Хайруллаев 1977 йилда туғилган. 1998 йилда Тошкент давлат техника университетини бакалавр босқичини, 2005 йилда Япония халқаро университетини магистр босқичини тамомлаган. Банк соҳасидаги меҳнат фаолиятини 1998 йилда «ЎзДЭУ Банк» (ҳозирги KDB Bank Uzbekistan)нинг Ғазначилик бўлимида мутахассис лавозимидан бошлаган.

Ж.Хайруллаев меҳнат фаолияти давомида "KDB Bank Uzbekistan" АЖ да турли лавозимларда, шу жумладан департамент директори лавозимида, 2021 йилдан 2023 йилгача эса Ипотека банкда Ғазначилик департаменти директори лавозимида ишлаган.

2023 йилнинг июнь ойидан 2024 йилнинг июль ойига қадар «Ипотека-банк» акциядорлик тижорат ипотека банки (Ipoteka bank OTP Group) бошқаруви раисининг ўринбосари – Корпоратив бошқарув блоки раҳбари, Бошқарув аъзоси сифатида фаолият юритган.

Лавозиимга тайинлангунга қадар Жамшид Хайруллаев Халқ банкининг Стратегия департаменти директори лавозимида ишлаб келаётган эди.