14 август куни эрталабки савдоларда "Трастбанк" ХАБнинг номинал қиймати 1 000 сўм бўлган акциялари 16 500 сўмгача кўтарилди.

Сўнгги 30 кун ичида акциялар 42,24%га, йил бошидан буён эса 83%га қимматлашди. Сўнгги 12 ойда акциялар 106%га ўсди, бунда ўсишнинг сезиларли қисми жорий йилга тўғри келган.

^{Трастбанк акциялари қийматининг ўзгариши. Фото-скриншот: Bankers.uz / Go Invest}

Банкнинг оддий акциялари бўйича тарихий максимум 2021 йил декабрь ойида 15 900 сўм даражасида қайд этилган. Шундан сўнг акциялар 2023 йил сентябрь ойида 15 000 сўмгача кўтарилган.

Жорий йилнинг 12 август куни эрталабки савдоларда "Трастбанк" ХАБ акциялари 14 400 сўмгача кўтарилиб, кун давомида 20% ўсди. Бу кунлик максимал ўсиш чегарасидир, дея қайд этади KAP DEPO инвестиция компанияси.

KAP DEPO мутахассислари фикрича, инвесторлар қизиқишининг сабабларидан бири банкнинг фойдани 1:1 нисбатда капитализация қилиш режаси бўлиши мумкин. Яъни, акциядорлар эгалик қилаётган ҳар бир акция учун яна битта қўшимча акция олади.

11 август куни Трастбанкнинг қўшимча акциялар чиқарилиши давлат рўйхатидан ўтказилди. Банк устав капиталини икки бараварга ошириш тўғрисида қарор 23 июль куни қабул қилинган эди.

UPD. Бугундан, 14 августдан биржада Трастбанкнинг оддий ва имтиёзли акциялари билан савдолар тўхтатилган.