Ўзбекистон Республикаси Марказий банкининг Банк назорати қўмитаси 2026 йилнинг июнь ойида ўтказилган 7 та йиғилиш давомида жами 34 та масалани кўриб чиқди. Йиғилишлар кун тартибидан кредит ташкилотларини рўйхатга олиш, молиявий ҳолатни баҳолаш ва қонунбузилиши ҳолатлари бўйича молия муассасаларига нисбатан тегишли жазо чораларини қўллаш каби масалалар ўрин олган.

Хусусан, Қўмитанинг ўтган ойдаги йиғилишларида қоидабузарликларга йўл қўйган молия муассасаларига нисбатан қатъий чоралар кўрилган. Қонунчилик талабларига мувофиқ фаолият юритмаганлиги, шунингдек, инспекция текширувлари ва ўрганишлар давомида аниқланган камчиликлари учун 21 та банк, 1 та микромолия ташкилоти ва 1 та тўлов ташкилотига нисбатан жарима санкциялари қўлланилган.

Пруденциал норматив талабларига риоя этмаганлиги ҳамда ўз фаолиятини белгиланган тартибда қонунчилик ҳужжатлари талабларига мувофиқлаштирмаганлиги учун 23 та банк келгусида чора ва санкциялар қўлланилиши тўғрисида қатъий огоҳлантирилган.

Шунингдек, Қўмита томонидан рўйхатга олиш ва рухсат бериш йўналишида жами 22 та масала кўриб чиқилган:

• Кредит ташкилотлари уставига киритилган ўзгартиришларни рўйхатдан ўтказиш — 6 та;
• Кредит ташкилотларининг устав фондидаги улушига эгалик қилиш учун рухсат бериш — 5 та;
• Тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш — 4 та;
• Микромолия ташкилотларини ҳисоб рўйхатидан ўтказиш ва тўлов ташкилотига лицензия бериш — 4 та;
• Банкларда аудит ўтказиш ҳуқуқини бериш учун аудиторлик малака сертификатларини тақдим этиш — 3 та.

Бундан ташқари, кредит ва тўлов ташкилотларининг молиявий ҳолатига оид 12 та масала муҳокама қилинган. Банк ва нобанк кредит ташкилотларида ўтказилган инспекция текширувлари натижалари ҳамда уларнинг тақсимланмаган фойдасини тақсимлаш масалалари ҳам йиғилишлар давомида кўриб чиқилиб, тегишли қарорлар қабул қилинган.

Эслатиб ўтамиз, яқинда Марказий банк истеъмолчилар ҳуқуқини бузган бир нечта банкларни жаримага тортгани ҳақида хабар берилган эди.