2022 йил октябрда Марказий банк томонидан лицензияси чақириб олинган "Hi-Tech Bank" АТБнинг Тошкентнинг марказидаги яна бир биноси e-auksion'да сотилди.

Банкрот бўлган банкнинг биноси Тошкент шаҳар Шайхонтоҳур тумани, Ўрда маҳалласи, Алишер Навоий кўчасида (Пахтакор стадиони ва Илҳом театри яқинида) жойлашган.

Бино илк бор 2023 йил августда 60 млрд сўм бошланғич баҳо билан савдога чиқарилган. Бироқ сотилмаган.

Бу галги аукционда 1 500 кв.м.лик бинони 77,8 млрд сўм таклиф билан "Olmos Finance" микромолия ташкилоти сотиб олди.

Hi-Tech Bank'нинг Бош офиси вазифасини бажарган Миробод тумани Шаҳрисабз кўчаси 15а-уй манзилидаги бинони 2023 йилда Ўзбекинвест суғурта компанияси 69 млрд сўмга сотиб олган эди.

Харидор ҳақида

"Olmos Finance" микромолия ташкилоти 2025 йил 13 ноябрда ташкил этилган. Юридик манзили Тошкент шаҳар Мирзо Улуғбек тумани Олмачи МФЙ, Паркент кўчаси 203-уй.

Жамият директори Шермуҳаммад Хўжамуродов, Ўзбекистондаги биринчи микромолия банки — Таянч микромолия банкининг олдинги раҳбари ҳисобланади.

"Olmos Finance" микромолия ташкилотига ANORBANK (бошқарув раиси ўринбосари) ҳамда Hayotbank (бошқарув раиси, Кузатув кенгаши аъзоси) топ менежментида ишлаган тажрибали банкир Зохид Алимов ҳамда Капиталбанкда бошқарув раиси, ANORBANK Кузатув кенгаши аъзоси лавозимларида ишлаган Шерзод Каримбаев тенг улушда эгалик қилади.