Жорий йилнинг январь ойида Марказий банк томонидан лицензияси чақириб олинган «Yangi Bank» АЖнинг Тошкент шаҳри марказида жойлашган бош офиси биноси электрон онлайн-аукцион савдоларига чиқарилди. Бу ҳақдаги тегишли лот «E-auksion» электрон савдо платформасига жойлаштирилган.

Мазкур кўчмас мулкни сотиш тўғрисидаги қарор банкнинг тугатиш комиссияси томонидан қабул қилинган.

^{Фото: E-auksion}

Сотувга қўйилган 5 қаватли бино 2017 йилда қурилган бўлиб, Тошкент шаҳрининг Юнусобод тумани, Амир Темур шоҳ кўчаси, 99-уйда жойлашган. Объект Ўзбекистон Миллий банки (NBU) бош биноси ҳамда «Бодомзор» метро бекати яқинида жойлашган.

Мазкур объект 0,25 гектар ер участкасида жойлашган бўлиб, унинг умумий майдони қарийб 3,6 минг квадрат метрни (аниқроғи 3 648 кв.м), фойдали майдони эса 2,5 минг квадрат метрни (2 548 кв.м) ташкил этади. Бино ўз ичига 47 та хизмат хонасини қамраб олган. Шунингдек, иншоот барча зарур муҳандислик коммуникациялари — газ, электр энергияси, сув таъминоти ва канализация тизимларига тўлиқ уланган.

Мазкур кўчмас мулк объекти очиқ аукцион савдолари орқали сотувга қўйилмоқда. Ким ошди савдосининг бошланғич баҳоси 163,3 млрд сўм этиб белгиланган бўлиб, иштирок этиш истагини билдирган талабгорлар 1,6 млрд сўм миқдорида кафолат пули (закалат) киритишлари лозим. Аукционда қатнашиш учун аризалар 20 июль куни соат 09:00 га қадар қабул қилинади ва савдо жараёнининг ўзи шу куни соат 10:00 да расман бошланади.

Мулкни сотишдан тушган маблағлар омонатлари Омонатларни кафолатлаш жамғармаси томонидан қопланмайдиган кредиторларнинг талабларини қондиришга йўналтирилади. Тугатиш комиссияси йиғилиши баённомасига мувофиқ, 22 июнь ҳолатига кўра «Yangi Bank»нинг тўртинчи навбатдаги кредиторлар олдидаги қарздорлиги 76,54 млрд сўмни ташкил этмоқда.

Эслатиб ўтамиз, 2026 йил 15 январда Ўзбекистон Республикаси Марказий банки пруденциал меъёрларни мунтазам равишда бузганлиги ҳамда рекорд даражадаги молиявий йўқотишларга йўл қўйганлиги сабабли «Yangi Bank»нинг банк фаолиятини амалга ошириш лицензиясини бекор қилган эди. Банк фаолияти тўхтатилган пайтда унинг тақсимланмаган зарари 171 млрд сўмга етган, банк устав капитали 182,9 млрд сўмни ташкил қилган эди.