Марказий банк томонидан Ўзбекистон олтин валюта захираларининг 1 июнь ҳолатига ҳисоботи эълон қилинди. Унга кўра, жорий ой бошига Ўзбекистоннинг ялпи халқаро захиралари май ойида 307,25 млн долларга (0,43%) камайиб, 70 млрд 584,7 млн долларни ташкил этган.

Захираларнинг камайишига асосан жаҳон бозорида олтин нархининг тушиши сабаб бўлган. Шундай бўлса-да, жами захираларимиздаги соф олтин ҳажми ва қимматли қоғозлар улуши сезиларли даражада ўсган.

^{Манба: Марказий банк}

Ўзбекистон Республикасининг ялпи халқаро захиралари ҳажми 2026 йил май ойида 307,3 млн. долларга камайди. Хусусан, ой давомида олтин нархининг 4625,80 доллардан 4516,85 долларгача тушишининг таъсири -1,5 млрд. долларни ташкил этди, дейилади Марказий банк изоҳида.

Май ойида олтин нархининг арзонлашиши ҳисобига олтин захираларининг доллардаги қиймати 0,25% га камайиб, 61 437,9 млн долларни ташкил этди.

Шунга қарамай, Марказий банк томонидан соф олтин сотиб олиш ҳажми ошган. Натижада олтиннинг жисмоний вазни 2,10% га ўсиб, 13,32 млн унциядан 13,6 млн трой унцияга (~423 тонна) етган. Умумий ҳисобда бир ойда захирага 9,3 тонна олтин қўшилган. 

Захиралар тузилмасида олтиннинг улуши 87%, хорижий валюта активларининг улуши эса 12,1% даражасида бўлган.

Хорижий валютадаги бошқа активлар: расмий захира активларга киритилмаган депозитлар ва расмий захира активларга киритилмаган олтин қарийб 50 млн долларга камайиб, 118,2 млн долларни ташкил қилди.

Эслатиб ўтамиз, Ўзбекистоннинг халқаро захиралари март ойидаги кескин пасайишдан кейин апрель ойида 1,9 млрд долларга ошган ва 70,9 млрд долларни ташкил қилган эди. Ўшанда захиралар ўсишининг асосий омили олтин нархининг ошиши бўлганди.