Ўзсаноатқурилишбанк акциядорларининг 2026 йил 8 апрелдаги навбатдан ташқари умумий йиғилишида банкнинг таъсис ҳужжатларига ўзгартиришлар киритилди ва Кузатув кенгаши таркиби янгиланди.

Йиғилиш қарорига кўра, Кузатув кенгаши аъзоси Саида Жарболованинг ваколатлари муддатидан аввал тугатилган.

Кенгаш таркибига "Franklin Templeton Asset Management" ХК МЧЖ вакили Мэтью Жон Анселл (Matthew John Ansell), Ханс Кристоф Мангольд (Hans Christoph Mangold) ҳамда Сайёра Аюповалар киритилди.

Мэтью Жон Анселл Franklin Templeton компаниясининг Ўзбекистондаги ходими, етакчи инвестицион аналитик. Узоқ йиллар McKinsey & Company консалтинг компаниясида ишлаган. Мэтью Жон Анселл Миллий инвестиция жамғармаси эгаси бўлган Ўзбекистон республика товар-хом ашё биржаси Кузатув кенгашида ҳам "Franklin Templeton Asset Management" ХК МЧЖни тамсил этади.

Ханс Кристоф Мангольд Германиянинг "Mangold Professional Services GmbH" ва "Frutree Silk Road GmbH" компанияларининг бошқарувчи директори ҳисобланади.

Сайёра Аюпова эса "Kompass Directors" консалтинг компаниясининг асосчиси ва бош ижрочи директори бўлиб, у мустақил аъзо сифатида сайланган. С.Аюпова Ўзбекистон республика товар-хом ашё биржаси Кузатув кенгашида ҳам мустақил аъзо сифатида сайланган.

Ўзсаноатқурилишбанк Кузатув кенгашининг янгиланган таркиби қуйидагича:

• Исаков Одилбек Рустамович
• Мухтаров Улуғбек Хакимович
• Атажанов Муродбек Бекберганович
• Георгий Чиладзе
• Ахмедов Умид Машарапович
• Matthew John Ansell
• Улянова Олга Геннадиевна
• Аизуп Юлия Александровна
• Ferdinand Willam Tuinstra
• Hans Christoph Mangold
• Аюпова Сайёра Якуповна

2026 йил 25 февраль куни қабул қилинган ПҚ-74-сонли президент қарорида Ўзсаноатқурилишбанкнинг 30,0% акцияси Ўзбекистон Республикаси миллий инвестиция жамғармасига берилиши кўзда тутилган эди.

ПҚ-74-сонли қарорда Миллий инвестиция жамғармаси эгалигига ўтказилган компаниялар Кузатув кенгашлари таркибига Жамғарманинг ишончли бошқарувчиси "Franklin Templeton Asset Management" ХК МЧЖ вакиллари киритилиши белгиланган.