2026 йилнинг январ ва феврал ойларида инфокиосклар орқали UZCARD банк карталарини тўлдиришнинг умумий ҳажми 2 триллион сўмни ташкил этди, бу ўтган йилнинг шу даврига нисбатан 5% га кўпдир. Бу ҳақда «Ягона умумреспублика процессинг маркази» АЖ хабар бермоқда.

^{Фото: UZCARD}

Бугунги кунда UZCARD тўлов тизимига 20 мингдан ортиқ инфокиоск уланган бўлиб, уларнинг катта қисмига тўлов ташкилотлари томонидан хизмат кўрсатилади. Инфокиоскларнинг асосий қисми пойтахтда, шунингдек республика вилоят марказларида жамланган бўлиб, улар орқали банк карталарига нақд пул маблағлари киритилади.

Нақд пул кирими сегментининг асосий иштирокчиси Paynet бўлиб, унинг улуши UZCARD тизимига уланган инфокиосклар айланмасининг 94% ини ташкил этади. Шу билан бирга, етакчининг улуши 2025 йилнинг дастлабки икки ойи билан солиштирганда бироз камайди. Ушбу ўзгаришга OSON айланмасининг 47% га ўсиши таъсир кўрсатди. Худди шундай динамика Ипак Йўли Банкда ҳам кузатилди — унинг инфокиосклари орқали тўлдириш ҳажми 2025 йилга нисбатан 5% га ошди.

Шу билан бирга, банклар орасида эътиборнинг «cash-in» банкоматлар ва универсал қурилмаларга кўчиши тенденцияси кузатилмоқда, чунки банкоматлар инфокиоскларга нисбатан кўпроқ функцияларга эга ва юқорироқ даромад келтиради.

Бозорга Alif компаниясининг инфокиосклари кириб келиши сўнгги ойларнинг муҳим янгилиги бўлди. Компания ўз инфокиоскларини метро станцияларида фаол ўрната бошлади. Жорий йилнинг дастлабки икки ойи якунларига кўра, ушбу инфокиосклар орқали UZCARD карталарини тўлдириш бўйича энг катта улуш Ипотека банк (14%), Ипак Йўли Банк (13%), Халқ банки (12%) ва Ўзмиллийбанк (12%) ҳиссаларига тўғри келди.

Paynet тизими орқали UZCARD карталарини тўлдиришнинг энг катта ҳажми Халқ банки карталари ҳиссасига тўғри келганини айтиб ўтиш жоиз. Унинг улуши 19% ни ташкил этди. Шу билан бирга, ушбу кўрсаткич ўтган йилга нисбатан 3% га камайди. Тузилманинг ўзгаришига Агробанк карталарига тўлдириш ҳажмининг қарийб 190 млрд сўмга етгани таъсир кўрсатди. Бу кўрсатгич ўтган йилга нисбатан 38% ўсган. Худди шундай ўсиш Ипак Йўли Банкда ҳам кузатилиб, унинг улуши 10% ни ташкил этди.

Аввалроқ UZCARD 2025 йилда 1,3 трлн сўм соф фойда олгани ҳақида хабар берган эдик.