"Payme" АЖ акциядорларининг 2026 йил 5 мартдаги умумий йиғилиши қарорига кўра, компанияни ажратиб чиқариш йўли билан қайта ташкил этиш (реорганизация) тартиботи бошланди. Унга кўра, Payme базасида мустақил фаолият юритувчи янги TBC TECH компанияси тузилади.

Мазкур жараён Ўзбекистон Республикасининг амалдаги қонунчилигига мувофиқ амалга оширилади. Акциядорлар томонидан Payme бош директорига қайта ташкил этиш билан боғлиқ барча юридик ва ташкилий ишларни бошлаш вазифаси топширилган.

Реорганизация доирасида аввало компаниянинг мавжуд активлари ва мажбуриятларини хатловдан ўтказиш (инвентаризация) учун махсус комиссия тузилади ҳамда тақсимлаш баланси ишлаб чиқилади. Шу билан бирга, Ўзбекистон меҳнат қонунчилиги талабларига қатъий риоя қилган ҳолда, янги ташкил этилаётган TBC TECH компаниясига ўтказиладиган ходимлар рўйхати шакллантирилиши кўзда тутилган.

Шунингдек, TBC TECH уставининг лойиҳаси ва унинг бошқарув органлари тузилмаси бўйича таклифлар тайёрланади. Жараённинг шаффофлиги ва қонунийлигини таъминлаш мақсадида барча зарур ҳужжатлар, жумладан, аудиторлик ҳисоботи ва молиявий прогнозлар илова қилинган ҳолда Ўзбекистон Марказий банкига расмий хабарнома юборилади. Бундан ташқари, барча маълум кредиторлар ҳам реорганизация ҳақида огоҳлантирилиб, ОАВ ҳамда Payme'нинг расмий веб-сайтида тегишли эълонлар жойлаштирилади.

Қайта ташкил этиш бўйича барча ҳужжатлар лойиҳалари тўлиқ тайёрлангандан сўнг, ушбу масала якуний кўриб чиқиш учун Payme Кузатув кенгашининг муҳокамасига киритилади.

Эслатиб ўтамиз ҳозирда "Payme" АЖнинг ягона акциядори "TBC Digital" АЖ ҳисобланади.

Аввалроқ Payme 2024 йилги соф фойданинг 240 млрд сўмини тақсимлаш бўйича қарор қабул қилганини ва 228 млрд сўмини февраль ойида тўлаб бўлганини хабар қилган эдик.