Марказий банк томонидан 2026 йил 1 январь ҳолатига муомаладаги банк пластик карталари, терминаллар, банкомат ва инфокиосклар ҳамда 2025 йил январь-декабрь ойлари давомида тўлов терминаллари орқали тушган тушумлар тўғрисида маълумотлар эълон қилинди.

Унга кўра, муомаладаги банк карталари сони ўтган йил давомида 6 млн 271 минг 17 тага ошиб, 68 млн 267 минг 436 тага етган.

Қайд этиш керакки, карталарнинг йиллик ўсиши 2024 йил (+15,7 млн) ва 2023 йил (+12,0 млн)га нисбатан кескин камайган. Бунга 2025 йил январидан Марказий банк томонидан бир нафар мижозга 20 тагача банк карта очиш бўйича чеклов қўйилгани ҳам таъсир кўрсатган бўлиши мумкин.

^{Инфографика: Шуҳрат Курбанов / LinkedIn / Gemini AI}

Муомаладаги банк карталари бўйича энг кўп ўсиш Uzum bank (+4,32 млн дона ёки 556,2%), Агробанк (+1,20 млн дона ёки 22,3%), Hamkorbank (+867,34 минг дона ёки 29,2%) ларда кузатилган. Банк тизимидаги жами ўсишнинг 68,9 фоизи Uzum bank ҳиссасига тўғри келган.

Шунингдек, 7 та банкда муомаладаги банк карталари сони 2024 йилга нисбатан камайган: Octobank (-2,97 млн дона), Халқ банки (-1,65 млн дона), TBC Bank (-1,37 млн дона), Асакабанк (-103,74 минг дона), Туронбанк (-102,36 минг дона), Мадад Инвест банк (-7,57 минг дона), Инфинбанк (-2,96 минг дона).

Octobank'даги бундай кескин пасайишга 2025 йилнинг июнида Humans VISA карталарига хизмат кўрсатишни тўхтатгани сабаб бўлиши мумкин.

^{Манба: Марказий банк}

Муомаладаги банк карталари сони бўйича 5 млн+ банклар: Халқ банки (10,77 млн дона), Агробанк (6,58 млн дона), Ипотека-банк (5,36 млн дона), Uzum bank (5,10 млн дона); 2 млн+ банклар: Ўзмиллийбанк (4,29 млн дона), TBC Bank (4,21 млн дона), Hamkorbank (3,84 млн дона), Ипак Йўли банки (3,61 млн дона), Anorbank (3,55 млн дона), Ўзсаноатқурилишбанк (2,90 млн дона), Алоқабанк (2,75 млн дона); MKBank (1,96 млн дона), Octobank (1,64 млн дона), Асакабанк (1,48 млн дона), Трастбанк (1,21 млн дона), Тенгебанк (1,19 млн дона), Давр-банк (1,11 млн дона).

Ўрнатилган тўлов терминаллари

Ўзбекистонда мавжуд тўлов терминаллари сони 4 537 тага кўпайиб, 430 минг 762 тага етди.

Тўлов терминаллари сонидаги ўсиш Hamkorbank (+22,23 мингта), Трастбанк (+3,02 мингта), Универсалбанк (+2,30 мингта) ларда кузатилган.

15 та банкда эса тўлов терминаллари сони камайган. Энг кўп пасайиш Халқ банки (-12,53 мингта), Агробанк (-4,21 мингта), Ипотека-банк (-3,60 мингта) ларда кузатилган.

Ўрнатилган банкоматлар ва инфокиосклар

Ўтган йилда банкоматлар ва инфокиоскларнинг умумий сони 29 минг 909 тадан 40 минг 90 тагача ошди. Банкомат ва инфокиосклар сони бўйича тўлов ташкилотлари яққол устунликни сақлаб қолмоқда — 22 600. Ўтган йилда тўлов ташкилотлари томонидан 9 мингта қурилма ўрнатилган.

Банклар кесимида 1 январь ҳолатига Халқ банки 3 134 та (+59), Агробанк 1 966 та (-187), Капиталбанк 1 478 та (-20) банкомат ва инфокиоскларга эгалик қилмоқда.

Тўлов терминаллари орқали тушган тушумлар

2025 йилда тўлов терминаллари орқали тушган тушумлар 460 трлн 260 млн сўмни ташкил қилди. Бунда энг кўп тушум Алоқабанк терминаллари орқали қабул қилинган (54,06 трлн сўм). Шунингдек, TBC Bank терминаллари орқали 33,2 трлн сўм, Ўзмиллийбанк 30,2 трлн сўм, Ипотека банк терминаллари орқали 28,8 трлн сўм миқдорида тушум қилинган.