Президент Шавкат Мирзиёев раислигида Тошкент шаҳрида хавфсиз муҳитни шакллантириш ҳамда жамоат хавфсизлигини самарали таъминлаш бўйича намунавий амалиётни яратиш чора-тадбирлари юзасидан видеоселектор йиғилиши бўлиб ўтди.

Йиғилишда Президент уч йил олдин Ички ишлар вазирлигида ташкил қилинган кибержиноятчиликка қарши курашиш бошқармасининг иши ҳали кўринмаётганини танқид қилди.

Ўтган йили пойтахтда кибержиноятлар сони 16 мингдан ортиб, фуқаролар қарийб 2 трлн сўм моддий зарар кўрган бўлса, уларни фош этиш даражаси 8 фоизга ҳам бормаган.

Қайд этилишича, жиноятчилар банк тизимидаги бўшлиқдан, аҳолининг ишонувчанлигидан ва технологик билими етишмаслигидан фойдаланмоқда.

“Ички ишлар ва прокуратурага бу йўналишда барча масалаларни ҳал қилиб берганман. Қани натижа? Банк ва тўлов ташкилотларида ҳимоя тизимларини жорий этиш қачон якунланади?” дея давлат раҳбари мутасаддилар олдига қатъий савол қўйди.

Маълумотларга кўра, кибержиноятлар кундан-кунга кўпайиб, унинг турлари 18 тадан 62 тага чиққан. Айниқса, шахсий маълумотларни ўғирлаш, сунъий интеллект орқали овоз ва юз қиёфасини ўхшатиш, зарарли файлларни тарқатиш авж оляпти. Ўзлаштирилган маблағлар криптовалюта шаклида четга чиқарилмоқда.

Йиғилишда мазкур жиноятларни тезкор фош этиш ва тўхтатиш учун ҳуқуқ-тартибот ходимлари кибертехнологиялар ва сунъий интеллектни мукаммал эгаллаши лозимлиги қайд этилган.

Шу боис, Ички ишлар вазирлигида кибержиноятчилик бўйича алоҳида департамент ташкил қилинади ва унга вазирнинг ўзи масъул бўлиши белгиланди. Адлия вазирлигида кибержиноятчилик ва рақамли ҳуқуқ бўйича алоҳида бошқарма очилади.

Эслатиб ўтамиз, Президент Шавкат Мирзиёев ўтган йил 3 ноябрь куни бўлиб ўтган тақдимотда сўнгги беш йилда Ўзбекистонда кибержиноятлар сони 68 баробарга кўпайгани, бир йилнинг ўзида 46 мингдан ортиқ кибержиноят аниқланиб, улар орқали жисмоний ва юридик шахсларга 1,2 трлн сўм моддий зарар етказилганини таъкидлаб, ушбу йўналишдаги ишларни танқид қилган эди.

Шунингдек, 2023 йил декабрь ойида бўлиб ўтган видеоселектор йиғилишида давлат раҳбари мазкур йўналишдаги ишлар бўйича танқид қилиб, мамлакатимизда 50 га яқин тўлов тизими борлиги, уларнинг ҳаммаси ҳам киберхавфсизлик талабларига жавоб бермаслигини айтган эди.