Fitch Ratings агентлиги 2026 йилда Ўзбекистон банк тизимида муаммоли кредитлар даражаси максимал кўрсаткичга етиб, умумий кредит портфелининг 9-10 фоизини ташкил этишини прогноз қилди.

Агентлик экспертларига кўра, бу асосан давлат банкларидаги “эски” хавфларни босқичма-босқич тан олиш билан боғлиқ бўлади.

“Биз, шунингдек, жисмоний шахслар портфелларида ҳам кредитлар ‘пишиши’ (loan seasoning) сабабли, муаммоли кредитлар кўпайишини кутмоқдамиз," дейилади Fitch баёнотида.

Банклардаги муаммоли кредитлар миқдори октябрь ойида 1,1 трлн сўмга кўпайиб, 22,3 трлн сўмга етди. Муаммоли кредитларнинг жами кредит қўйилмаларидаги улуши 3,77 фоизни ташкил қилмоқда. Муаммоли кредитларнинг катта миқдори (15,8 трлн сўм) давлат улуши мавжуд банкларга тегишлидир. Қолган банклардаги NPL ҳажми 6,5 трлн сўмни ташкил қилади.

Давлат банклари томонидан йирик кредитларни ҳисобдан чиқариш (write-off) амалиёти ва Марказий банкнинг чакана кредитлашга нисбатан эҳтиёткор, айниқса, гаровсиз истеъмол кредитларига нисбатан қаттиқ позицияси кредитлар ўсишини чеклаб туради.

Шунга қарамай, Fitch’нинг асосий (базавий) сценарийсига кўра, кредитлар ўсиши барибир мустаҳкам бўлиб, тахминан 15 фоиз атрофида бўлиши кутилмоқда.

Эслатиб ўтамиз, аввалроқ Fitch Ratings TBC Bank Uzbekistan бўйича прогнозини қайтадан "барқарор"га ўзгартиргани ҳақида хабар берган эдик.