Ижтимоий тармоқларда Humans ва Humans Companies компанияси Азия Альянс банк олдида молиявий мажбуриятлари борлиги ҳақида хабарлар тарқалди. Азия Альянс банк телеграм каналида ушбу хабарлар бўйича расмий муносабат билдирди.

Хабарда айтилишича, Humans ва Humans Companies компаниялар гуруҳи банк олдида бир қатор мажбуриятларга эга.

"Тузилган шартномалар шартлари мунтазам равишда бузилганлиги ва ўз зиммасига олинган мажбуриятлар бажарилмаганлиги сабабли, банк қарздорликни ундириш тартибини бошлашга мажбур бўлган", дейилади муносабат матнида.

Тегишли ишларни суд инстанцияларида кўриш жараёнида Азия Альянс банк томонидан 65 млрд сўмдан ортиқ қарздорликни ундириш бўйича даъво аризалари киритилган.

Банк конструктив мулоқот учун очиқ бўлиб қолиши ва юзага келган вазиятга ўз позицияси бўйича тушунтириш беришга тайёрлигини маълум қилган.

Эслатиб ўтамиз, жорий йил июнь ойида Octobank Humans компаниясига қарши даъво киритилган судда ютиб чиққанини маълум қилганди. Суд Humans'га 500 млрд сўмдан ортиқ қарздорликни ундириш ва етказилган зарарни қоплаш бўйича банк фойдасига қарор қабул қилган.