“Poytaxt Bank” АЖ томонидан қўшимча равишда номинал қиймати 1 000 сўм бўлган 400 млн дона умумий қиймати 400 млрд сўмлик эгасининг номи ёзилган оддий акциялар чиқарилади. Бу ҳақда Корпоратив ахборот ягона порталида маълумот берилди.

Банк устав капитали очилгандан буён 100 млрд сўмни ташкил қилиб келган.

Янги чиқарилаётган акциялар банкнинг ягона акциядори “Bond Investment Limited” LLC (БАА) компаниясига ёпиқ обуна усулида қонунчиликда ўрнатилган тартибда, давлат рўйхатига олинган кундан бошлаб 1 йил давомида жойлаштирилади. Ушбу чиқарилишдаги акциялар учун тўловлар банкнинг ҳисоб рақамига миллий валютада нақдсиз шаклдаги пул маблағларини ўтказиш йўли орқали амалга оширилади.

"Банклар ва банк фаолияти тўғрисида"ги қонунга кўра тижорат банклари устав капиталининг энг кам миқдори 2025 йилнинг 1 январидан 500 млрд сўм этиб белгиланган. Охирги маълумотларга кўра, Yangi Bank, Пойтахт банк, Эрон Содерот банк, Пойтахт банк ҳамда яқинда лицензияси олиб қўйилган Евроосиё банки бу талабни бажармай келаётган эди.

Жорий йил бошида Марказий банк пруденциал назорати департаменти директори Нусратулла Фозилов Poytaxt Bank 2024 йилда хусусийлаштирилгани боис банкка нисбатан уставни минимал миқдорга етказиш учун 2028 йилгача бўлган муддат белгиланганини маълум қилганди.