Марказий банк Бошқарувининг 2025 йил 27 августдаги қарорига мувофиқ “Евроосиё Банки” акциядорлик жамиятидан банк фаолиятини амалга ошириш ҳуқуқини берувчи лицензия чақириб олинди. Банк Қозоғистоннинг "Евроосиё банки“нинг шўъба ташкилоти ҳисобланади.

"Евроосиё Банки" 2024 йилнинг 11 январида банк фаолиятини амалга ошириш учун лицензия олган эди.

Лицензиянинг чақириб олинишига сабаб сифатида банк томонидан устав капитали миқдори қонунчиликда белгиланган энг кам талабларга мувофиқлаштирилмаганлиги ҳамда банклар ва банк фаолияти тўғрисидаги қонунчиликда белгиланган бошқа талаблар бажарилмаганлиги кўрсатилган.

“Ўзбекистон Республикаси Марказий банки тўғрисида”ги ҳамда “Банклар ва банк фаолияти тўғрисида”ги қонунларда белгилаб қўйилганидек, агар банк минимал капитал талабларига ёки қонун ҳужжатларига амал қилмаса, Марказий банк лицензияни бекор қилиш ҳуқуқига эга.

Банкнинг Ўзбекистонда шўъба банки очилиши ҳақида Марказий банк собиқ раиси Мамаризо Нурмуратов 2023 йилнинг май ойидаги матбуот анжуманида гапириб, ўшанда банкка дастлабки рухсатнома берилганини маълум қилган эди. Кейинчалик, 2023 йилнинг декабрь ойида Қозоғистон Молия бозорини тартибга солиш ва ривожлантириш агентлиги Евроосиё банкига Ўзбекистонда фаолият кўрсатишга ва худди шу номдаги шўъба банкни очишга рухсат берган эди.

2024 йилнинг куз ойларида интернет тармоғидаги untitlednow.com сайтида "Untitled Bank" (таржимаси — "Номсиз банк" -— таҳр.) номи билан банк фаолият юритишни бошлаганини эълон қилганди. Шунингдек, LinkedIn ижтимоий тармоғида жойлашуви Тошкент шаҳрида бўлган "Untitled Bank" номи остидаги ташкилот банк соҳаси мутахассислари учун бир нечта вакансияларни эълон қилган. Юқоридаги сайт ва ижтимоий тармоқ саҳифаларида мазкур банк ўзини Ўзбекистондаги янги рақамли банк эканлигини ҳамда банк фаолиятини олиб бориш учун лицензияга эгалигини маълум қилган ва бу банк Евроосиё банки эканлиги маълум бўлганди.

Бироқ амалда банк ўз фаолиятини тўлақонли амалга ошира олмади, Марказий банк маълумотларига кўра унинг мижозлар базаси, депозит ва кредит портфели деярли шаклланмади.

"Евросиё банки" АЖ (АО "Евразийский банк") - Қозоғистоннинг 29 йиллик ривожланиш тарихига эга ижтимоий аҳамиятга эга тижорат банки ҳисобланади. У активлари бўйича мамлакатнинг энг йирик банклари ўнталигига киради, чакана банк бозорида етакчи ўринни эгаллайди, корпоратив мижозлар ҳамда кичик ва ўрта бизнес субъектлари учун кенг кўламли хизматлар кўрсатади. Қозоғистон Республикаси ҳудудида банкнинг 19 та ҳудудий филиали ва 119 та касса бўлими мавжуд. Банк ERG (Eurasian Group, Евросиё молия компанияси) гуруҳи экотизимига (минерал ресурсларни қазиб олиш ва қайта ишлаш соҳасидаги дунёдаги энг йирик компаниялардан бири) киради.

“Forbes.kz” маълумотларига кўра, банк акцияларига эгалик қилувчи ERG компанияси якуний эгалари Ибрагимовлар оиласи ҳамда тадбиркорлар Александр Машкевич ва Фаттоҳ Шодиевлар ҳисобланади. 2022 йил Фаттоҳ Шодиевнинг ўғли Олимжон Шодиевнинг "Support Level" компанияси Ўзбекистоннинг "Ўзагроэкспортбанк"идаги давлат улушини 5 миллион долларга танловсиз сотиб олиб, бир қатор мажбуриятларни ўз зиммасига олган эди. Кейинчалик банк номи AVO Bank деб ўзгартирилган ҳамда бошқа қозоғистонлик тадбиркор эгалигига ўтган эди.

Эслатиб ўтамиз, Евроосиё банки Ўзбекистондаги иккинчи қозоқ банкига айланганди. 2019 йилнинг ёзидан буён мамлакатда Қозоғистон Халқ банкининг (Halyk Bank) шўъба корхонаси - Tenge bank фаолият юритмоқда.