Президентнинг тегишли қарорига кўра Рустем Махаммадиев Ўзбекистон Республикаси Миллий статистика қўмитаси раиси ўринбосари лавозимига тайинланди.

Махаммадиев Рустем Дилшодович 1988 йилда Тошкент шаҳрида туғилган. Миллати – ўзбек. Маълумоти олий: 2010 йилда Тошкент молия институтини, 2017 йилда Корея Илғор илм ва технологиялар институтини тамомлаган.

Меҳнат фаолияти давомида Р. Мухаммадиев 2011-2019 йилларда Марказий банк Департаментларида турли лавозимларда, хусусан, бўлим бошлиғи, бошқарма бошлиғи сифатида ишлаган.

Р. Мухаммадиев 2019 - 2021 йилларда Халқаро валюта жамғармасининг Вашингтондаги штаб-квартираси ижрочи директорининг маслаҳатчиси сифатида фаолият олиб борган.

Лавозимга тайинлангунга қадар - 2021 йилдан буён Ўзбекистон Республикаси Марказий банки Молиявий барқарорлик департаменти директори бўлиб ишлаб келаётган эди.

Эслатиб ўтамиз, жорий йил февраль ойида Президент ҳузуридаги Статистика агентлиги директори лавозимига Марказий банк раиси бўлиб ишлаб келган Беҳзод Ҳамраев тайинланган эди.

Кейинчалик, март ойидаги Президент фармонига кўра, Президент ҳузуридаги Статистика агентлиги Миллий статистика қўмитаси сифатида қайта ташкил этилганди.