Президентнинг "Ўзбекистон Республикаси мустақиллигининг ўттиз тўрт йиллиги муносабати билан давлат хизматчилари ҳамда ишлаб чиқариш ва ижтимоий-иқтисодий соҳалар ходимларидан бир гуруҳини мукофотлаш тўғрисида"ги Фармони эълон қилинди.

Фармонга кўра, мамлакатимизда кенг кўламли ислоҳотларни муваффақиятли амалга ошириш, юртимизнинг иқтисодий тараққиёти ва халқимиз фаровонлигини таъминлаш, Янги Ўзбекистоннинг халқаро миқёсдаги обрў-эътибори ва нуфузини юксалтиришга қўшган муносиб ҳиссаси, илғор инновацион технологияларни амалиётга жорий этиш, замонавий ишлаб чиқариш қувватларини яратиш, ҳудудлар инфратузилмасини жадал ривожлантириш борасидаги улкан хизматлари, жамиятимизда ижтимоий-маънавий барқарорликни сақлаш, ёш авлодни Ватанга муҳаббат ва садоқат, миллий ва умуминсоний қадриятларга ҳурмат руҳида тарбиялаш йўлидаги ибратли фаолияти ҳамда жамоат ишларидаги фаол иштироки учун бир қатор шахслар мукофотланди.

Мукофотланганлар қаторида Ўзбекистон банк тизими вакиллари ҳам бор. Хусусан, Ўзбекистон Республикаси Марказий банки раиси Тимур Аминджанович Ишметов "Меҳнат шуҳрати" ордени билан тақдирланди. 

Шунингдек, акциядорлик тижорат "Халқ банки" бошқаруви раиси Шуҳрат Атабаев, "Ўзсаноатқурилишбанк" АТБ бошқаруви раиси Азиз Акбаржонов, "Асакабанк" АЖ бошқаруви раиси Кудратилла Туляганов "Дўстлик" ордени билан, "Микрокредитбанк" АТБ бошқаруви раиси Ориф Бутаев - "Содиқ хизматлари учун" медали билан мукофотланди.

Эслатиб ўтамиз, яқинда Президент "Тадбиркорлар куни" муносабати билан бир гуруҳ шахсларни тақдирлаган, улар орасида банк ва финтех вакиллари ҳам бор эди.