Президент Шавкат Мирзиёев тадбиркорлар куни муносабати билан бир гуруҳ тадбиркорларни орден ва медаллар билан мукофотлади. Бу ҳақда Президент матбуот хизмати хабар қилди.

Фармон матнида қайд этилишича, "Ўзбекистонда тадбиркорликни қўллаб-қувватлаш, ишбилармонлик муҳитини яхшилаш борасида яратилган имкониятлардан унумли фойдаланиб, мамлакатнинг иқтисодий қудрати ва экспорт салоҳиятини юксалтиришда салмоқли натижаларга эришаётгани, ташаббускорлиги, замонавий билим ва тажрибасини намоён этиб, инвестицияларни жалб қилиш, импорт ўрнини босадиган маҳсулотлар ишлаб чиқариш, хизматлар кўрсатишни янада кенгайтириш, аҳоли бандлиги ва фаровонлигини таъминлаш йўлида алоҳида жонбозлик кўрсатаётгани, шунингдек, ўзининг муҳим илмий-амалий ишланмалари ва инновацион лойиҳалари билан бизнес соҳаси ривожига муносиб ҳисса қўшиб келаётгани учун" бир гуруҳ тадбиркорлар мукофотланган.

Мукофотланганлар орасида банк ва финтех соҳаси вакиллари ҳам бор. Хусусан:

"Дўстлик" ордени билан:

TBC Bank бош директори (TBC Bank Uzbekistan) Николоз Курдиани;

"Шуҳрат" медали билан:

"InFinBank" акциядорлик жамияти бошқаруви раиси Ольга Леонидовна Нуманова;

"Click" акциядорлик жамияти раҳбари Улугбек Шахзодович Рустамов мукофотланди.

Шунингдек, "InFinBank" акциядорлик жамияти асосий акциядори, тадбиркор Фарход Фахритдинович Маматджанов "Ўзбекистон Республикасида хизмат кўрсатган тадбиркор" фахрий унвони билан тақдирланди.