Ўзбекистон финтех бозори яна бир янги хизмат кўрсатувчи "ўйинчи" билан бойиди. Йирик хусусий банклардан бири “Hamkorbank” АТБ ҳамда Украиналик тадбиркор Дмитри Дубилет томонидан асос солинган "Fintech Farm" стартапи ҳамкорлигида янги хизмат — Tezbank ишга туширилмоқда.

Банк сайтидаги маълумотларга кўра, "Tezbank - Ҳамкорбанкнинг молиявий операцияларни янада қулайлаштирувчи мобил хизмати" ҳисобланади. Хизмат кўрсатувчи юридик манзили сифатида Hamkorbank бош офисини кўрсатган.

Tezbank ҳозирда 50 млн сўмлик кредит лимити тақдим этувчи карталари учун олдиндан буюртмаларни очган.

Необанк — бу фақат рақамли форматда фаолият юритувчи, филиалларсиз, мобил илова орқали хизмат кўрсатадиган банк тури. У анъанавий банкка қараганда оддийроқ, тезкор ва кўпинча арзонроқ хизматлар таклиф қилади.

Янги платформа янада ривожланган мобил илова ва мижозларга йўналтирилган рақамли воситаларни таклиф қилиш орқали ўрнатилган Ўзбекистон хизматлари билан рақобатлашишни мақсад қилган.

Tezbank Fintech Farmнинг бешинчи необанки ҳисобланади, лойиҳа Leobank (Озарбайжон), Liobank (Вьетнам), Simbank (Қирғизистон) ва Roarbank (Ҳиндистон)дан кейин ишга туширилди. Компания охирги бозорини 2024 йил май ойида очган эди. Шу билан бирга, Fintech Farm’нинг Нигериядаги бошқа необанк лойиҳаси 2023 йилда ёпилган.

2024 йил май ойида Forbes Ukraine нашри Fintech Farm’нинг Қирғизистон, Ҳиндистон ва эҳтимол Марокаш бозорларига кириш режалари ҳақида хабар қилганди. Шу пайтда финтех компанияси Bank of Georgia бошчилигидаги инвесторлардан 32 млн долларлик инвестиция раундини кенгайтирганини эълон қилди. Жалб қилинган маблағлар Fintech Farm’нинг баҳосини 2023 йилда 100 млн доллардан оширишга ёрдам берди.

Fintech Farm 2020 йилда Дмитрий Дубилет (ПриватБанкнинг собиқ менежери ва monobank ҳамасосчиси), Николай Безкровный (Лондондаги KPMG’нинг финтех йўналиши бўйича собиқ M&A раҳбари) ва Александр Витязь (ПриватБанк Электрон бизнес марказининг собиқ раҳбари) томонидан ташкил этилган.

Эслатиб ўтамиз, яқинда TBC Bank Group OLX савдо платформасини сотиб олгани ҳақида ёзган эдик.