TBC Bank Group (TBC PLC) Ўзбекистондаги энг йирик онлайн савдо платформаларидан бири OLX Uzbekistan’нинг назорат пакетини сотиб олганини маълум қилди. Хабарда айтилишича, сотувчи томон — Prosus таркибига кирувчи OLX Group бўлган.

OLX Uzbekistan — мамлакатдаги энг кўп ташриф буюриладиган 6-сайт бўлиб, ойига 5,4 миллион фаол фойдаланувчи ва 2,2 миллион амалдагии эълонга эга. Хизматлар, товарлар, автоуловлар ва кўчмас мулк савдоси учун етакчи платформа сифатида у интернет аудиториясининг 20 фоиздан ортиғини қамраб олади.

Бу битим Ўзбекистон технология секторидаги сўнгги 30 йилдаги энг йирик M&A (қўшилиш ва сотиб олиш) жараёнларидан бири сифатида қайд этилмоқда.

Сотиб олиш жараёнида TBC Bank Group Titan Investments билан қўшма корхона тузди. Бунда OLX Uzbekistan акцияларининг 100%и қўшма корхонага ўтади. TBC Bank Group 50% + 1 акцияга, Titan Investments эса қолган улушга эгалик қилади.

Битим тегишли тартибга солувчи органлар рухсатини олгандан сўнг расмий якунланади.

Маълум қилинишича, OLX Uzbekistan ўз бренди остида фаолият юритишни давом эттиради.

TBC Bank Group OLX Uzbekistan’ни ўз экотизимига интеграция қилиш орқали, янги мижоз сегментларига кириш, аудитория улушини кенгайтириш, молиявий ва рақамли хизматларни бирлаштиришни режалаштирмоқда.

“Бизнинг экотизим 21 миллион ноёб фойдаланувчини қамраб олган. OLX Uzbekistan’ни сотиб олиш кенгайиш ва диверсификация стратегиямиздаги мантиқий қадамдир. Бу қадам янги фойдаланувчилар учун инновацион рақамли банк ечимларини яратишни тезлаштиради. Titan билан ҳамкорлик эса онлайн эълонлар хизматини янада ривожлантириш имконини беради”. - деб изоҳлаган TBC Uzbekistan бош директори Ника Курдиани.

Эслатиб ўтамиз, TBC Uzbekistan — TBC Bank Group (80%), ЕТТБ (10%) ва Халқаро молия корпорацияси (10%)га тегишли TBC Digital компанияси орқали бошқарилади. Шунингдек, жорий йил июнь ойида TBC Bank Group чакана савдо учун SaaS платформаси ҳисобланган BILLZ’нинг назорат пакетини ҳам сотиб олган эди.