Бугун 22 август, жума куни долларнинг расмий курси 56 сўм 70 тийинга тушиб, бир неча ойлик энг паст кўрсаткичга етди. Бу ҳақда Марказий банк хабар берди. Ҳозирда 1 АҚШ доллари 12 357,09 сўмга ёки сешанба кунгидан 167 сўм 83 тийинга арзонга сотилмоқда. Бу курс 2024 йил 6 январдан бери энг паст кўрсаткичдир, ўшанда курс 12 355,16 сўмни ташкил қилганди.

Евро бугун 137 сўм 75 тийинга арзонлашди ва 14 330,52 сўмга баҳоланди - бу жорий йилнинг июнь ойидан бери энг паст кўрсаткич. Фунт стерлинг курси 8 апрелдан бери биринчи марта 16573,33 сўмга тушди - бир кун аввалгидан 155,5 сўмга кам.

2025 йилнинг январь-июль ойлари якунларига кўра ўзбек сўми АҚШ долларига нисбатан сезиларли даражада мустаҳкамланди. Биринчи етти ойда долларнинг расмий курси 2,55 фоизга ёки 328 сўмга арзонлашди.

Доллар курсининг пасайишига турли сабабларни келтириш мумкин. Улар орасида Доналд Трамп сиёсати туфайли Америка валютасига бўлган ишончнинг пасайиши, олтинга глобал талабнинг ортиши, трансчегаравий ўтказмаларнинг кўпайиши, шунингдек, экспорт тушумлари фонида валюта таклифининг кўпайиши, унга бўлган талаб чекланганлигини айтиш мумкин.

Баҳорда Халқаро валюта жамғармаси Марказий банкка валюта курсининг мослашувчанлигини ошириш ва унинг кенгроқ диапазонда ўзгаришига имкон беришни тавсия қилди. Мутахассисларнинг фикрича, бу ташқи зарбалардан ҳимояланиш ва пул-кредит сиёсатининг трансмиссиясини кучайтириш имконини беради. Ташкилотнинг таъкидлашича, расмийлар маслаҳатни ижобий қабул қилишди.

Эслатиб ўтамиз, июлда Ўзбекистон олтин-валюта захиралари бироз кўпайгани ҳақида ёзгандик.