2025 йилнинг июл ойида Ўзбекистоннинг олтин-валюта захиралари 48,74 миллиард долларга етди. Бу июн ойида қайд этилган қийматга нисбатан 193,7 миллион долларлик (0.4%) ўсишни англатади. Йил бошидан бугунгача эса умумий захира ҳажми 7,56 миллиард долларга (18,4%) ошди. Бу ҳақда Марказий банк берган жадвалда кўрсатилган. 

Ўзбекистон Олтин захиралари ҳажми 20 минг троя унцияга камайиб, 11.7 миллион троя унцияни ташкил қилса-да, жаҳон бозорида нархи ошгани боис қиймати рекорд кўрсаткичга - 38,68 млрд долларга етди. Бу ўтган ойдан 265 миллион долларга кўп.

Валюта захиралари эса июл охирида 63,3 млн долларга қисқариб, 9,5 млрд доллар даражасига тушди — бу феврал ойидан буён энг паст кўрсаткичдир.

Июл ойида Марказий банкнинг қимматли қоғозлар портфели сезиларли кенгайди. 1-август ҳолатига кўра, унинг қиймати 1,01 млрд долларни ташкил этиб, ой давомида 303 млн долларга ёки 42,7% га ошди.

Захиралар тузилмасида олтиннинг улуши юқори даражада сақланиб қолди — 79,4% (ўтган йилнинг шу даврида — 77,9%). Акция ва облигациялар улуши 2% дан ошган, валюта активлари улуши эса 19,5% даражасида қайд этилди.

Маълумот ўрнида, Ўзбекистон июн ойида 9 тонна олтин сотиб олиб, энг кўп олтин сотиб олган марказий банклардан бўлди.