Япониянинг "Gojo & Company, Inc." компанияси бош офиси Тошкент вилоятида жойлашган "Renesans" микромолия ташкилотининг 9.8 фоиз акцияларига инвестиция киритгани маълум бўлди. "Renesans ММТ" АЖ томонидан корпоратив ахборотлар ягона порталига май ойида жойлаштирилган маълумотларга таянилса, япон компанияси микромолия ташкилотининг ҳар бир дона акцияси номиналига нисбатан 8.65 баробар кўпроқ пул тўлаган. 

Gojo & Company, Inc. Япониянинг Токио шаҳрида жойлашган молиявий холдинг бўлиб, компания таъсисчилари қаторида Mitsui, Itochu, Marubeni, SMBC, Dai-Ichi Life Insurance, Jafco, Marui, Ricoh, Credit Saison каби йирик япон бизнеслари санаб ўтилган. 

Холдинг дунёнинг 14 давлатида фаолият юритувчи банк ва молия ташкилотларига эгалик қилади. Жумладан, мазкур компания сўнгги йилларда Грузиянинг активлари бўйича 5-ўринда бўлган Credo банки, Тожикистоннинг Arvand Банки ҳамда Humo микрокредит – депозит ташкилоти (Ўзбекистондаги микромолия банкининг муқобили), Африканинг 7 давлатида фаолият юритувчи Baobab Group каби молия ташкилотлари акциядорига айланган.

Renesans микромолия ташкилоти акциядорлик жамияти 2007 йилда ташкил этилган бўлиб, бугунги кунда Ўзбекистон бўйлаб 24 та филиалга эга. Асосий эътиборини анъанавий ва замонавий каналлар орқали қишлоқ жойлардаги жисмоний шахсларга, жумладан аёл тадбиркорларга, микро ва кичик бизнесга мослаштирилган ва қулай микромолия хизматларини тақдим этиш ва уларни ривожлантиришга қаратади.

Эслатиб ўтамиз, "Renesans" микромолия ташкилоти Bankers.uz томонидан тузилган "2024 йилнинг ТОП 10 микромолия ташкилотлари" рўйхатига кирган.