Ўзбекистонда Humans брендига эгалик қилувчи Сингапурнинг Humans Mobile компанияси Ўзбекистонга қарши арбитраж ишини бошлади. У давлат органлари, жумладан, Марказий банк ва "Ўзбектелеком"ни компания ҳуқуқларини бузишда айблаётгани ҳақида хабар берган эдик.

Мазкур вазият бўйича Ўзбектелеком ("O'zbektelekom") АК расмий муносабат билдирди. Қуйида мазкур муносабатнинг асосий қисми тақдим этилади.

Ўзи аслида нима бўлган эди?

Биринчидан, Humans виртуал оператори, бошқа мобил операторлардан фарқли равишда, ўз тармоғини яратиш учун сармоя киритмаган. Шунинг учун, у мобил алоқа хизматларини кўрсатишга 2020 йилдан буён шартнома асосида “Ўзбектелеком” АК мобил тармоғидан фойдаланиб келган.

Иккинчидан, баъзи ОАВларда “Ўзбектелеком” АК томонидан Humans операторига нисбатан “бозордаги устун (монопол) мавқесидан фойдаланиб босим ўтказаётганлиги” тўғрисида нохолис ахборотлар тарқалмоқда. Аслида: Humans ўз инфраструктурасига эга “O'zbektelecom” АКдан ташқари Ucell, Beeline, Mobiuz каби бошқа мобил операторлари билан ҳам шартнома асосида хизматларини кўрсатиши мумкин, қонунчиликда фақат “Ўзбектелеком” АК билан мобил инфраструктурадан фойдаланиш керак деб ҳеч жойда белгиланмаган.

Учинчидан, “Ўзбектелеком” АК Ўзбекистонда интернет хизматларини арзонлаштириш ва уларни аҳолига яна-да қулай қилиш бўйича муҳим ишларни амалга ошириб келмоқда. Натижада, халқаро интернет каналларининг ўтказувчанлик қобилияти кенгайтирилиши ҳисобига оператор ва провайдерлар учун 1 Мбит/с интернет нархи 2017-2024 йилларда 40 баробарга арзонлаштирилди.

Тўртинчидан, Humans узоқ муддат давомида шартнома мажбуриятларини тизимли равишда бузиб келган, яъни кўрсатилган хизматлар бўйича катта миқдорда қарздорликни тўламасдан келган. “Ўзбектелеком” АК фақат истемолчилар ҳуқуқи бузилмаслигини ўйлаб, ўз хизматини давом эттирган.

Шу муносабат билан “Ўзбектелеком” АК мавжуд қарздорликни ундириш ва келгусида компанияга зарарни камайтириш мақсадида тегишли судга даъво аризаси киритишга мажбур бўлди. Мазкур даъво жорий йилнинг 8 май куни Тошкент шаҳар иқтисодий судининг “Ўзбектелеком” АК томонидан кўрсатилган хизматлар учун қарздорлик юзасидан “Humans” компаниясига нисбатан чиқарган суд қарори эълон қилинди.

Келгусида жамоатчиликни, тартибга солувчи органлар ва бизнес ҳамкорларни чалғитувчи, ҳақиқатга тўғри келмайдиган маълумотлар тарқатилса, “Ўзбектелеком” АК ўз ишбилармонлик обрўсини ҳимоя қилиш мақсадида судга мурожаат қилиш ҳуқуқини ўзида сақлаб қолади. - дейилади муносабат матнида.