Марказий банк апрель ойи учун банк депозитлари ва кредитлари бўйича ўртача тортилган ставкаларни эълон қилди. Унга кўра, аҳолига ажратилаётган миллий валютадаги кредитлар ставкаси март ойига нисбатан 1 фоизга пасайиб, 22,6 фоизни ташкил қилди. Охирги марта бундай арзон ставка 2023 йилнинг март ойида қайд этилган эди.

Аҳолига ажратилган кредитлар ставкаси 2024 йилнинг декабрь ойида 24,9 фоизлик юқори кўрсаткичга чиққандан сўнг, жорий йил бошидан кетма-кет пасайишда давом этди. Бизнесга ажратилаётган кредит ставкалари эса тегишли давр ичида кўтарилиб борди (+0,5 фоиз). Апрель ойида тадбиркорлик субъектларига ажратилаётган кредит фоизлари 22,9 фоизга етди. Бу аҳолига ажратилаётган кредит ставкаларидан 0,3 фоизга юқорироқ кўрсаткичдир.

^{Инфографика: Марказий банк}

Шунингдек, апрелда жисмоний шахсларнинг муддатли депозитлари фоизи 0,5 фоизга пасайди ва 21,6 фоизни ташкил қилди. Бу тижорат банкларидаги омонатлар ставкаларининг “Марказий банк кўрсатмаси”га биноан 23 фоиздан паст кўрсаткичга туширилгани билан боғлиқ бўлиши мумкин. Депозит ставкалари 2024 йилнинг октябрь ойидан буён 22,1 фоиз даражасида ўзгармай келаётган эди.

Юридик шахсларнинг муддатли депозитлари эса март ойидаги кўрсаткичга нисбатан 0,9 фоизга ошди ва 17,5 фоизга етди.

Хориж валютасидаги депозит ва кредитлар

Февраль ва март ойларидаги пасайишдан сўнг жисмоний шахсларнинг депозит ставкалари апрелдан яна ўса бошлади (+0,2 фоиз) ва 5,1 фоизга етиб январь ойидаги кўрсаткичга тенглашди.

Юридик шахсларнинг депозит ставкалари тушишда давом этмоқда. Ўтган йилнинг ноябрь ойидаги 6,3 фоизлик юқори кўрсаткич апрелга келиб 2 фоизга пасайди ва 4,3 фоизга тенг бўлди.

^{Инфографика: Марказий банк}

Чет эл валютасидаги қисқа муддатли кредит фоиз ставкалари апрелда кескин пасайди (-1,2 фоиз). Жорий йил бошидан бери 10,5-10,6 фоиз даражасида сақланиб келаётган қисқа муддатли кредитлар апрелда 9,4 фоизни ташкил қилди.

Узоқ муддатли кредитлар 0,5 фоизга ўсиб, 10,3 фоизга етди.