2025 йилнинг апрель ойида Марказий банкнинг Банк назорати қўмитаси томонидан саккиз марта йиғилиш ўтказилиб, 45 та масала кўриб чиқилди, деб хабар бермоқда регулятор ахборот хизмати.

Рўйхатга олиш ва рухсат бериш йўналишида 26 та масала, кредит ташкилотлари уставига киритилган ўзгартиришларни рўйхатдан ўтказиш бўйича тўртта, янги очилаётган микромолия ташкилотларини ҳисоб рўйхатидан ўтказиш юзасидан бешта масала ўрганилган.

Кредит ташкилотларининг устав фондидаги улушига эгалик қилиш учун рухсат бериш (1 та) ва банкларда аудит ўтказиш ҳуқуқини бериш учун аудиторлик малака сертификатини тақдим этиш (1 та), шунингдек, тижорат банклари кузатув кенгаши ва бошқаруви аъзолари ҳамда муҳим аҳамиятга эга ходимларининг номзодларини кўриб чиқиш (15 та) билан боғлиқ масала кўриб чиқилди.

Шу билан бирга, кредит ташкилотларининг молиявий ҳолатига оид 19 та масала – Марказий банкнинг кўрсатмалари ва пруденсиал меъёрлари талабларининг бажарилиши, тижорат банклари ва микромолия ташкилотларида ўтказилган инспекция натижалари ҳам муҳокама қилинган.

Тўлов тизими оператори ва тўлов ташкилотлари томонидан устав капиталининг энг кам миқдорини шакллантирилиши ҳамда ташкилий-ҳуқуқий шаклини акциядорлик жамиятига ўзгартирилиши бўйича қонунчилик талабларига риоя қилинмаганлиги учун битта тўлов тизими оператори ва учта тўлов ташкилоти чора ҳамда санкциялар қўлланилиши тўғрисида огоҳлантирилди.

Шунингдек, Марказий банк томонидан ўтказилган ўрганиш ва инспекция текширувлари давомида аниқланган қоидабузарликлар ҳамда жисмоний шахсларга банк ҳисобварақлари очиш ва уларни рўйхатдан ўтказиш бўйича белгиланган талаблар таъминланмаганлиги учун олтита банк, учта ломбард ва иккита микромолия ташкилотига нисбатан жарима санкцияси қўлланилди.

Эслатиб ўтамиз, февраль ойида Марказий банк томонидан бешта банк жаримага тортилган эди.